অৰুণাচলৰ পশ্চিম কামেং জিলাৰ ন্যুমাডুঙৰ টম হীলত ১৬ নৱেম্বৰ শুকুৰবাৰৰ পৰা পঞ্চম য়াক মেলাৰ আয়োজন কৰা হৈছে। আইচিএআৰ-ৰাষ্ট্ৰীয় য়াক গৱেষণা কেন্দ্ৰৰ দ্বাৰা য়াকৰ ওপৰত সচেতনতা বৃদ্ধিৰ বাবে তথা য়াকৰ বৈজ্ঞানিক ভিত্তিক লালন-পালন আৰু সংৰক্ষণক উদগণি দিয়াৰ বাবে এই য়াক মেলাখনৰ আয়োজন কৰা হৈছে।
এই য়াক মেলাখনৰ আয়োজন কৰিছে কলকাতাৰ আইচিএআৰ-এনআইআৰজেএফটি, ভৰতীয় সেনা, (২২ মাহাৰ ৰেজিমেণ্ট). ৪ আইপিবিপি, এছএছবিৰ ৩০ বেটেলিয়ন, এছএছবি এনএমএএছ, এএইচ্চ আৰু পশু চিকিৎসা বিভাগ, কৃষি বিজ্ঞান কেন্দ্ৰ আৰু ডিৰাং চক্ৰৰ প্ৰশাসনে।
আইচিএআৰ-ৰাষ্ট্ৰীয় য়াক গৱেষণা কেন্দ্ৰ হৈছে সমগ্ৰ বিশ্বতেই একমাত্ৰ য়াকৰ ওপৰত থকা গৱেষণা কেন্দ্ৰ। এইটো গৱেষণা কেন্দ্ৰই ১৫০গৰাকী য়াক পালকক বিজ্ঞান সন্মতভাৱে য়াক পোহাৰ ক্ষেত্ৰত সহায় কৰি আহিছে। মেলাত এই গৱেষণা প্ৰতিষ্ঠানটোৱে বিকশিত কৰা বিভিন্ন প্ৰযুক্তি যুৱচামৰ ওচৰত প্ৰদৰ্শন কৰে।
আৰম্ভণি অনুষ্ঠানত ভাষণ দি বিধায়ক ফুৰ্বা ছেৰিঙে ব্ৰোকপাসকললৈ (য়াক পালক) য়াক পালনৰ ক্ষেত্ৰত সন্মুখীন হোৱা ডাঙৰ সমস্যাৱলী বিচাৰি উলিয়াই সেইসমূহ আইচিএআৰ-ৰাষ্ট্ৰীয় য়াক গৱেষণা কেন্দ্ৰৰ বৈজ্ঞানিকসকলৰ সৈতে পৰামৰ্শ কৰিবলৈ অনুৰোধ জনায়।
আইচিএআৰ-ৰাষ্ট্ৰীয় য়াক গৱেষণা কেন্দ্ৰৰ সঞ্চালক ড০ পি চক্ৰৱৰ্তীয়ে দেশত বৈজ্ঞানিক ভিত্তিক য়াক পালনত উদগণি দিয়াৰ লক্ষ্যেৰে য়াক মেলা অনুষ্ঠিত কৰাৰ উদ্দেশ্য ব্যাখ্যা কৰে।
অনুষ্ঠানত আইচিএআৰ-ৰাষ্ট্ৰীয় য়াক গৱেষণা কেন্দ্ৰৰ সঞ্চালক ড০ এ এন ৰয়, ডিৰাঙৰ এডিচি টোকো বাবু, সামৰিক আৰু অৰ্ধ সামৰিক বাহিনীৰ বিষয়াসকল, পশু চিকিৎসা বিজ্ঞান মহাবিদ্যালয়ৰ অধ্যাপকসকল, এএইউ আৰু ডিৰাং চক্ৰৰ সকলো বিভাগীয় মুৰব্বী উপস্থিত থাকে। পশ্চিম কামেং জিলাৰ বিভিন্ন স্থানৰ পৰা ৫০০তকৈও অধিক সংখ্যক য়াক পালকে এই য়াক মেলাত অংশগ্ৰহণ কৰে।
