বেংকৰ ছেভিংছ একাউণ্টত যদি ন্যূনতম বেলেঞ্চ নাথাকে তেন্তে জৰিমনা ভৰিব লাগিব। কেন্দ্ৰীয় চৰকাৰে কেইবাবছৰ পূৰ্বে এই নিয়ম প্ৰৱৰ্তন কৰিছিল। লক্ষ্য আছিল বেংকৰ লোকচানৰ পৰিমাণ হ্ৰাস কৰা। কিন্তু এতিয়া ব্যক্তিগত বেংকে সেই গাইডলাইন ব্যৱহাৰ কৰি ইচ্ছামতে ন্যূনতম বেলেঞ্চ নিৰ্ধাৰণ কৰিবলৈ আৰম্ভ কৰিছে। আইচিআইচিআই বেংকে ঘোষণা কৰিছে যে পূৰ্বতে নিৰ্ধাৰণ কৰা ছেভিংছ একাউণ্টত থকা ন্যূনতম বেলেঞ্চৰ পৰিমাণ বহু পৰিমাণে বৃদ্ধি কৰা হৈছে।
এতিয়াৰে পৰা মহানগৰ বা নগৰ অঞ্চলৰ আইচিআইচিআইৰ গ্ৰাহকে ন্যূনতম বেলেঞ্চ ৫০ হাজাৰ টকা ৰাখিব লাগিব। আগতে এই সংখ্যা আছিল ১০ হাজাৰ টকা। গ্ৰাম্য বা অৰ্ধনগৰ অঞ্চলৰ শাখাসমূহত ন্যূনতম বেলেঞ্চ ২৫ হাজাৰ টকা ৰাখিব লাগিব। পূৰ্বে এই সংখ্যা আছিল ৫ হাজাৰ। গ্ৰাম্য শাখাৰ ক্ষেত্ৰত আগতে ন্যূনতম বেলেঞ্চ আছিল ২.৫ হাজাৰ টকা। সেয়া এতিয়া ১০ হাজাৰ টকা। ১ আগষ্টৰ পৰা কাৰ্যকৰী হ’ব এই নতুন নিয়ম।যদি গ্ৰাহকে মাহৰ শেষত এই ন্যূনতম বেলেঞ্চ বজাই ৰাখিব নোৱাৰে তেন্তে তেওঁলোকে ডাঙৰ জৰিমনা ভৰিব লাগিব।
উল্লেখ্য যে, ২০১৭ চনৰ এপ্ৰিল মাহত প্ৰায় ৫ বছৰৰ পাছত কেন্দ্ৰই ন্যূনতম বেলেঞ্চ ৰক্ষণাবেক্ষণ নকৰাৰ বাবে জৰিমনা বিহাৰ নিয়ম প্ৰৱৰ্তন কৰে। এই সিদ্ধান্তক সমগ্ৰ দেশতে ব্যাপক সমালোচনা কৰা হয়। এই সিদ্ধান্তৰ ফলত নিম্ন আৰু নিম্ন মধ্যবিত্ত শ্ৰেণীৰ লোকক ভয়াৱহ প্ৰভাৱ পৰিব বুলি বিৰোধীয়ে অভিযোগ উত্থাপন কৰে। কাৰণ এইসকল লোকৰ বাবে মাহৰ শেষত ন্যূনতম বেলেঞ্চ ৰক্ষা কৰাটো কঠিন। ইয়াৰ ওপৰত যদি জৰিমনা আৰোপ কৰা হয়, তেন্তে দৰিদ্ৰ জনসাধাৰণে সঁচাকৈয়ে এক কঠিন সমস্যাৰ সন্মুখীন হ’ব লাগিব। এতিয়া আইচিআইচিআই বেংকে ন্যূনতম বেলেঞ্চ ইমানেই বৃদ্ধি কৰিছে যে উচ্চ শ্ৰেণীয়েও হয়তো চিন্তা কৰিব লাগিব।
