জম্মু-কাশ্মীৰত ৩৭০ ধাৰা প্ৰত্যাহাৰ তথা বিশেষ মৰ্যাদা প্ৰত্যাহাৰৰ পাছৰে পৰা পাকিস্তানী প্ৰধান মন্ত্ৰী ইমৰাণ খানে প্ৰায়েই যুদ্ধৰ ভাবুকি দিবলৈ লৈছে।
পৰোক্ষ পৰমানু যুদ্ধৰ কথা উল্লেখ কৰি পাক প্ৰধান মন্ত্ৰী গৰাকীয়ে কৈছে যে দুয়োখন দেশেই পৰমানু ক্ষমতাৰ অধিকাৰী। প্ৰয়োজন হ’লে ইছলামাবাদে পৰমানু অস্ত্ৰ প্ৰয়োগ কৰিবলৈ দ্বিধা নকৰে।
ইপিনে, বাধ্য হৈ ভাৰতেও চলাব পাৰে পৰমানু আক্ৰমণ। কিন্তু দেশ দুখনৰ এই পৰমানু যুদ্ধৰ ফল কি হ’ব?
মাৰ্কিন সমীক্ষকসকলে এনে যুদ্ধৰ পৰিণতি কি হ’ব পাৰে সেয়া বিশ্লেষণ কৰি চাইছে। কোৱা হৈছে সেয়া হ’লে মুহূৰ্তৰ ভিতৰতে প্ৰাণ হেৰুৱাব ১০ কোটি লোকে।
চলিত বছৰৰ শেহতীয়া হিচাপ মতে দুয়োখন দেশৰ লগত ১৪০ৰ পৰা ১৫০টা পৰমানু অস্ত্ৰ আছে। ২০২৫’ত এই অস্ত্ৰৰ সংখ্যা ২০০ৰ পৰা ২৫০ লৈকে বৃদ্ধি পাব।
যুদ্ধ হ’লে দুয়োখন দেশেই এই পাৰমানৱিক অস্ত্ৰ ব্যৱহাৰ কৰিব। ইয়াৰ ফলত সৃষ্টি হ’ব এক ভয়ংকৰ পৰিস্থিতিৰ।
মাৰ্কিন যুক্তৰাষ্ট্ৰৰ ছায়েন্স এডভান্স নামৰ জাৰ্ণেলত প্ৰকাশিত প্ৰতিবেদনত কোৱা হৈছে যে পৰমানু যুদ্ধ হ’লে কেৱল ভাৰত আৰু পাকিস্তানেই নহয়, গোটেই বিশ্বতেই পৰিব মাৰাত্মক প্ৰভাৱ।
সমগ্ৰ বিশ্বতেই খাদ্য সংকটে দেখা দিব। অনাহাৰত মৃত্যু মুখত পৰিব বহু লোক।
বিজ্ঞানী সমীক্ষক সকলে জানিব দিয়ে যে আকাশত ১ কোটি ৬০ লাখৰ পৰা ৩ কোটি ৬০ লাখ টন পৰিমানৰ ক’লা কাৰ্বণ কণা সিঁচৰিত হৈ পৰিব।
সেই প্ৰদূষণে সমগ্ৰ পৃথিৱীৰ আকাশ ছানি ধৰিব। সৃষ্টি হ’ব কাৰ্বণ কণাৰ স্তৰ আৰু ইয়াত বাধাপ্ৰাপ্ত হ’ব সূৰ্যৰ ৰশ্মি। তীব্ৰভাৱে হ্ৰাস পাব তাপমাত্ৰা।
বিজ্ঞানীসকলে স্পষ্ট কৰি কৈছে যে পৰমানু যুদ্ধ হ’লে সমগ্ৰ বিশ্বতে দুইৰ পৰা পাঁচ ডিগ্ৰী চেলছিয়াছ তাপমাত্ৰা হ্ৰাস পাব।
একেদৰে বৰষুণৰ পৰিমান ১৫-৩০ শতাংশ হ্ৰাস পাব। ইয়াৰ প্ৰত্যক্ষ প্ৰভাৱ পৰিব কৃষিত। পানীৰ নাটনি হোৱাৰ উপৰি অনাহাৰত মৃত্যুৰ সন্মুখীন হ’ব বহু লোক।
কলোৰাডো বিশ্ববিদ্যালয়ৰ গৱেষক বিজ্ঞানী ব্ৰায়ান টুনে কয় যে অকল কোটি কোটি মানুহ মৃত্যু মুখত পৰাই নহয়, সমগ্ৰ বিশ্বতে সৃষ্টি হ’ব শীত প্ৰবাহৰ। পৃথিৱীত প্ৰাগ ঐতিহাসিক কালৰ বৰফৰ যুগৰ শীত নামি আহিব পাৰে।
