বৰ্তমান ইন্টাৰনেটৰ যুগত google search engine অবিহনে ডিজিটেল বিশ্বৰ সৈতে সম্পৰ্কৰ কথা প্ৰায় কল্পনাই কৰিব নোৱাৰি।
ইন্টাৰনেটৰ সৈতে সম্পৰ্ক ৰখা প্ৰতিজন ব্যক্তিয়ে গুগলৰ মাধ্যমেৰেই জ্ঞানৰ পৰিসৰ বৃদ্ধি কৰি আহিছে।
স্বাভাৱিকতেই বিজ্ঞান-প্ৰযুক্তি নিৰ্ভৰ সাম্প্ৰতিক সময়ত গুগলৰ ওপৰত মানুহৰ অগাধ বিশ্বাস গঢ়ি উঠিছে।
গুগলক বৰ্তমান সময়ত বহুতেই এক জীৱন্ত বিশ্বকোষ হিচাপেও বিবেচনা কৰে।
গুগলে কেৱল সমসাময়িক বিশ্বৰ তথ্য দাঙি ধৰাই নহয়, লগতে ই ইতিহাসকে ধৰি বিভিন্ন বিষয়ৰ জ্ঞানৰ ভাণ্ডাৰ হিচাপেও অনুসন্ধিৎসু লোকৰ উৎস হৈ পৰিছে।
বিশ্বৰ কোটি কোটি লোকৰ বিশ্বাস আৰু নিৰ্ভৰতাৰ উৎস গুগলত প্ৰকাশিত কোনো ভুল তথ্য বা ছবিয়ে স্বাভাৱিকতেই সুধীজনক বিপথে পৰিচালিত কৰিব পাৰে।
এনে এক ভ্ৰান্তিৰ কথাকে আমি এতিয়া আঙুলিয়াই দিব খুজিছো।
গুগলত অসমৰ ইতিহাসৰ সৰ্বকালৰ শ্ৰেষ্ঠ বীৰ লাচিত বৰফুকনৰ বিষয়ে জানিবলৈ আগ্ৰহী হৈ কোনোবাই যদি ক্লিক কৰে, তেতিয়াই ৱিকিপিডিয়াকে ধৰি তেওঁৰ বিষয়ে বৰ্ণিত হোৱা পেজবোৰ স্ক্ৰীণত ভাহি উঠে।
কিন্তু উক্ত পেজখন চকুৰ সন্মুখত ভাহি উঠাৰ সময়তে আপুনি লক্ষ্য কৰিব যে পেজখনত লাচিত বৰফুকনৰ ঠাইত অসমৰ মুখ্য মন্ত্ৰী সৰ্বানন্দ সোণোৱালৰ ফটোখন লগোৱা আছে।
গুগলৰ কাৰিকৰী ত্ৰুটীৰ বাবেই এনে হৈছে নে আন কিবা কাৰণত হৈছে সেয়া অৱশ্যেই জনা নাযায়। কিন্তু অসমৰ ইতিহাসৰ এগৰাকী স্বনামধন্য বীৰৰ পৃষ্ঠাত ঘটা এনে ত্ৰুটী দুৰ্ভাগ্যজনক।
স্বাভাৱিকতেই এই বিষয়টোৱে মুখ্য মন্ত্ৰীগৰাকীৰ মৰ্যাদাকো আঘাত হানিছে বুলি ক’ব পাৰি।
দেশ-বিদেশৰ অনুসন্ধিৎসু জ্ঞান অন্বেষণকাৰীৰ মনত বহুৱাব পৰা সাঁচটোৰ কথাও আমি উপলব্ধি কৰা উচিত।
এতিয়া এইক্ষেত্ৰত অসম চৰকাৰে গুগল কৰ্তৃপক্ষক বিষয়টো অৱগত কৰি শুধৰণিৰ ব্যৱস্থা কৰাটো উচিত নহ’বনে?
