বৰপেটা- বঙাইগাঁও জিলাৰ সীমামূৰীয়া লাংলাৰ পৰা বৃহৎ পৰিমাণৰ তেলসহ আটক চোৰাং তেল ব্যৱসায়ী

বঙাইগাঁও শোধনাগাৰৰ পৰা ৰে’লযোগে বিভিন্ন ঠাইলৈ কঢ়িওৱা পেট্ৰ’লৰ চুৰি কাৰ্য অব্যাহত আছে ৷ এই তেল চুৰি কাণ্ড শোধনাগাৰৰ পৰা তেল কঢ়িয়াই ৰে’ল এখন বাহিৰলৈ ওলাই নিউ বঙাইগাঁওলৈ আহি থকা অৱস্থাতে দুষ্ট চক্ৰই সংঘটিত কৰে ৷ দীৰ্ঘদিন ধৰি চলন্ত ৰে’লৰ পৰা তেল চুৰি কাৰ্য সংঘটিত হৈ অহাৰ পিচত শেহতীয়াকৈ ৰে’লৱে আৰক্ষীৰ গা লৰা পৰিলক্ষিত হৈছে ৷

ফলত হঠাতে বঙাইগাঁৱৰ নিউ বঙাইগাওঁ ৰে’লৱে আৰক্ষীয়ে এক গোপন সূত্ৰৰ পম খেদি বৰপেটা- বঙাইগাঁও জিলাৰ সীমামূৰীয়া লাংলাত অভিযান চলায় ৷ এই অভিযানত এটা তেল চোৰৰ ব্যৱসায়ৰ লগত জড়িত এজনক আটক কৰিবলৈ সক্ষম হয় । ৰে’লৱে আৰক্ষীয়ে প্ৰকাশ কৰা মতে ধৃত ব্যৱসায়জন বৰপেটা জিলাৰ লাংলাৰ ইয়াৰ আলী (৩৪) ৷

নিউ বঙাইগাঁও ৰে’লৱে আৰক্ষীয়ে লাভ কৰা এক গোপন সূত্ৰৰ খবৰৰ ভিত্তিত ইয়াৰ আলীৰ লাংলাৰ গুদামত অতৰ্কিতে চলোৱা অভিযানত ১৯ টা পেট্ৰ’লভৰ্তি ড্ৰামৰ লগতে ১৭ টা খালি ড্ৰাম,পাইপ আৰু কুপি আদি জব্দ কৰে ৷ জব্দ কৰা তেলৰ পৰিমাণ প্ৰায় ৪ হেজাৰ লিটাৰ হ’ব ৷

নিউ বঙাইগাওঁ ৰে’লৱে আৰক্ষী সংবাদ মাধ্যমক সদৰি কৰা মতে ধৃত ইয়াৰ আলীয়ে ঢালিগাঁৱৰ পৰা ৰে’লযোগে ওলাই অহা পেট্ৰ’লৰ লগতে ৰে’লৰ ইঞ্জিনৰ পৰা চোৰাংভাৱে কঢ়িয়াই নিয়া তেল চোৰ চক্ৰৰ পৰা তেল ক্ৰয় কৰি মফচলীয় অঞ্চলত দীৰ্ঘ দিনৰে পৰা ব্যৱসায় অব্যাহত ৰাখি আহিছিল আৰু এই কথা স্বীকাৰ কৰিছে৷