লোকসভা আৰু পঞ্চায়ত নিৰ্বাচনত ইছলাম ধৰ্মৰ এগৰাকী ইমামে বিজেপিৰ হৈ কাম কৰাৰ বাবে তেওঁক মছজিদৰ পৰা খেদি পঠিওৱাৰ অভিযোগ উত্থাপন হৈছে কৰিমগঞ্জ জিলাত।
কৰিমগঞ্জ জিলাৰ বাৰইগ্ৰাম অঞ্চলৰ জুনেইদখা জামে মছজিদৰ ইমাম মৌলনা মহম্মদ জাকাৰিয়াক নিৰ্বাচনৰ সময়ত বিজেপিৰ হৈ কাম কৰা কাৰণে কিছু সংখ্যক স্থানীয় লোকে মছজিদ কমিটিৰ লগত লগ হৈ মছজিদৰ পৰা খেদি পঠিয়াই বুলি অঞ্চলটোৰ সৰ্বত্ৰে চৰ্চা লাভ কৰিছে।
শুকুৰবাৰে ইমামগৰাকীক একমাত্ৰ বিজেপিৰ হকে কাম কৰা বাবেই ইছলাম ধৰ্মৰ পবিত্ৰস্থান হিচাপে গণ্য কৰা মছজিদৰ দায়িত্বত থকা সন্মানীয় আসনৰ পৰা উলিয়াই দিয়া হয় বুলি সন্দেহ কৰা হয়।
আনহাতে, ইমাম গৰাকীক বিজেপিৰ হকে কাম কৰাৰ কাৰণে মছজিদৰ পৰা খেদি দিয়াৰ খবৰ বিয়পি পৰাৰ পাছতে বিজেপিৰ সংখ্যালঘু মৰ্চাৰ ৰাজ্যিক সম্পাদক ইকবাল হুছেইনে স্থানীয় জনসাধাৰণৰ সৈতে ঘটনা সন্দৰ্ভত এখন আলোচনাত মিলিত হৈ এনে ঘটনাক দুৰ্ভাগ্যজনক আখ্যা দিয়ে।
উল্লখযোগ্য যে, সমগ্ৰ ঘটনা সন্দৰ্ভত সাংবাদিকে মছজিদ পৰিচালনা কমিতিক প্ৰশ্ন সোধাত তেওঁলোকে ঘটনাটোৰ পৰা দায় সাৰিবলৈ চেষ্টা কৰি বেলেগ কাৰণতহে ইমামক মছজিদৰ পৰা খেদি পঠিওৱা বুলি কয়। কমিটিৰ এজন সদস্যই এ আই য়ু ডি এফৰ এজন স্থানীয় নেতাৰ সহযোগত ইমাম গৰাকীৰ লগত এই সম্বন্ধে কথা পাতি সকলো বুজা পৰা কৰিছে বুলিও উল্লখ কৰে।
পূৰ্বেও মঙলদৈ জিলাৰ এজন ইছলাম ধৰ্মৰ নাগৰিকে বিজেপিক ভোট দিয়া বাবে তেওঁক অঞ্চলটোৰ কিছু সংখ্যক ৰাইজে মিলি মছজিদলৈ যোৱা নিষিদ্ধ কৰাৰ বাতৰি প্ৰকাশ হৈছিল।
