মৰ্মান্তিক! শিশু কন্যাক উদ্ধাৰ কৰিবলৈ গৈ কুঁৱাত পৰিল ৪০জন লোক; মৃত কমেও ৪জন
এটা গভীৰ কুঁৱাত একেলগে পৰিল ৪০ জনকৈ লোক। মধ্য প্ৰদেশৰ বিদিশা জিলাৰ বাছোদা অঞ্চলত সংঘটিত হৈছে এই মৰ্মান্তিক ঘটনা।
ঘটনা অনুসৰি, বৃহস্পতিবাৰে প্ৰথমতে কুঁৱাটোত পৰি যায় এটি ৮ বছৰীয়া কন্যা শিশু। শিশুটিক উদ্ধাৰ কৰিবলৈ চেষ্টা চলাইছিল গাঁৱবাসীয়ে।
তেনে সময়তে বহু মানুহৰ ভিৰ সহ্য কৰিব নোৱাৰি কুঁৱাটো হুৰহুৰাই ভাঙি পৰি ৪০জনকৈ লোক তাত পৰি যায়।
ততাতয়াকৈ খৱৰ পাই আৰক্ষী আৰু প্ৰশাসনৰ উদ্ধাৰকাৰী দল আহি গাঁওবাসীৰ সহযোগত উদ্ধাৰ কাৰ্য আৰম্ভ কৰে।
আৰক্ষীয়ে জানিবলৈ দিয়া মতে ৪জন লোকৰ মৃত্যু ঘটিছে আৰু ৩০জনক উদ্ধাৰ কৰা হৈছে। উদ্ধাৰ হোৱা সকলোৱে কম বেছি পৰিমানে আহত হৈছে। ইয়াৰে ৫জনক হাস্পাতালত ভৰ্তি কৰা হৈছে। বাকী ১০জন লোক এতিয়াও সন্ধানহীন হৈ আছে।
ৰাজ্যখনৰ মুখ্যমন্ত্ৰী শিৱৰাজ সিং চৌহানে এই ঘটনাত উদ্বিগ্নতা প্ৰকাশ কৰিছে আৰু উদ্ধাৰ কাৰ্য ক্ষিপ্ৰতৰ কৰি তোলাৰ নিৰ্দেশ দিছে।
কেনেদৰে এই ঘটনা সংঘটিত হ’বলৈ পালে তাৰ এক উচ্চ পৰ্যায়ৰ তদন্তৰ নিৰ্দেশো দিছে মুখ্যমন্ত্ৰীয়ে। চৰকাৰে উদ্ধাৰ হোৱা ব্যক্তিসকলৰ চিকিৎসাত যাতে কোনো ত্ৰুটী নঘটে তাৰ বাবে লক্ষ্য ৰাখিব বুলি জানিব দিয়ে মুখ্যমন্ত্ৰীগৰাকীয়ে।