দেশৰ স্বাধীনতা দিৱসৰ দিনা আগশাৰীৰ প্ৰকৃতি সংগঠন আৰণ্যকে ইন্টাৰনেচনেল ৰাইনো ফাউণ্ডেচনৰ সহযোগত বন্যপ্ৰাণী অপৰাধ নিয়ন্ত্ৰণত সহায়ক হোৱাকৈ কাৰ্বি আংলং জিলা আৰক্ষীক এখন নতুন বলেৰ’ গাড়ী আৰু দুখন ১৫০ চিচি পালচাৰ মটৰ চাইকেল প্ৰদান কৰে৷
স্বাধীনতা দিৱসৰ দিনা কাৰ্বি আংলং জিলাৰ আৰক্ষী অধীক্ষক দেৱজিত দেউৰীয়ে আৰণ্যকৰ সচিব প্ৰধান ড৹ বিভৱ কুমাৰ তালুকদাৰ আৰু ইন্টাৰনেচনেল ৰাইনো ফাউণ্ডেচনৰ এচিয়াৰ সমন্বয়ক ৰাহুল দত্তৰ পৰা আনুষ্ঠানিকভাৱে এই উপহাৰ গ্ৰহণ কৰে৷
এই উপহাৰ প্ৰদান অনুষ্ঠানত জিলাখনৰ অতিৰিক্ত আৰক্ষী অধীক্ষক ইন্দ্ৰনীল বৰুৱা আৰু হেমন্ত বৰুৱাও উপস্থিত থাকে৷
এই প্ৰসংগত মত প্ৰকাশ কৰি ড৹ বিভৱ কুমাৰ তালুকদাৰে জনায় যে ভৌগোলিকভাৱে কাৰ্বি আংলং জিলাৰ অৱস্থিতি এনে যে বহু সময়ত বন্যপ্ৰাণী অপৰাধীয়ে ইয়াৰ সুবিধা গ্ৰহন কৰি কাজিৰঙাত গঁড় হত্যা কৰিব পাৰে৷
এনে দুষ্কৃতিকাৰীক কৰায়ত্ত কৰি শাস্তি প্ৰদানৰ বাবে কাৰ্বি আংলং জিলা আৰক্ষীয়ে যথেষ্ট কষ্ট কৰিব লগা হয়৷ যাৰ পটভূমিত আমাৰ এই সহায়ে কাৰ্বি আংলং জিলা আৰক্ষীক উপকৃত কৰিব বুলি আমি আশাবাদী, তেওঁ কয়৷
উল্লেখ্য যে আৰণ্যকৰ উদ্যোগত ইয়াৰ আগতে গোলাঘাট আৰক্ষীক ৬খন পালচাৰ মটৰচাইকেল, দৰং আৰক্ষীক দুখন মটৰ চাইকেল আৰু বোকাখাত আৰক্ষী থানাত দুটা চি চি টি ভি কেমেৰা প্ৰদান কৰিছিল৷
ইয়াৰ উপৰিও ওৰাং ৰাষ্ট্ৰীয় উদ্যানক এখম স্পিড বোট আৰু এখন জীপচি গাড়ী, দুখন থৰ গাড়ী আৰু এখন কেম্পাৰ গাড়ী কাজিৰঙা ৰাষ্ট্ৰীয় উদ্যানক প্ৰদান কৰিছিল৷
আৰক্ষী বিভাগৰ উচ্চপদস্থ বিষয়াৰে আলোচনা কৰি কেতবোৰ নিৰ্বাচিত জিলাত আমি গঁড় হত্যাৰ দৰে অপৰাধ নিয়ন্ত্ৰনৰ বাবে আমি এনে সহযোগিতা আগবঢ়াইছো বুলিও জনায় ড৹ বিভৱ কুমাৰ তালুকদাৰে৷
