সমগ্ৰ দেশৰ লগতে বোকাখাততো উদযাপিত হয় দেশ ৭৬ সংখ্যক স্বাধীনতা দিৱস৷ এই উপলক্ষে বোকাখাতৰ ৰাজহুৱা খেল পথাৰত মহকুমা প্ৰশাসনৰ দ্বাৰা কেন্দ্ৰীয়ভাৱে আয়োজিত স্বাধীনতা দিৱসৰ কাৰ্যসুচীত ৰাষ্ট্ৰীয় পতাকা উত্তোলন কৰে মহকুমাধিপতি ডাঃ নেহা যাদৱে ৷
পতাকা উত্তোলনৰ পুৰ্বেই তেওঁ আৰক্ষীৰ অভিৱাদন গ্ৰহন কৰে ৷ পতাকা উত্তোলন কৰি মহকুমাধিপতি গৰাকীয়ে দিয়া ভাষণৰ পিচতেই আৰক্ষী, গঁড় সুৰক্ষা বাহিনী আৰু বিভিন্ন শিক্ষানুষ্ঠানৰ ছাত্ৰ-ছাত্ৰীয়ে কুচ কাৱাজ প্ৰদৰ্শন কৰে ৷
বোকাখাতৰ স্বাধীনতা দিৱস উদযাপনৰ ইতিহাসত প্ৰথম বাৰৰ বাবে এখন গ্ৰন্থ উন্মোচিত কৰা হয় ৷ স্বাধীনতা দিৱসৰ এই বিশেষ অনুষ্ঠানতে বোকাখাতৰ প্ৰবীণ সাংবাদিক, সাহিত্যিক পেঞ্চনাৰ ভৱেশ শইকীয়াৰ স্বাধীনতাৰ ৰ’দ কাঁচলিত বোকাখাত নামৰ গ্ৰন্থখন আনুষ্ঠানিক ভাৱে উন্মোচন কৰে মহকুমাধিপতি ডাঃ নেহা যাদৱে ৷
বোকাখাত পৌৰসভাৰ দ্বাৰা আয়োজিত প্রভাত ফেৰি আৰু দেশপ্রেমমূলক গীত-মাত পৰিৱেশনেৰে আৰম্ভ হোৱা স্বাধীনতা দিৱসৰ কাৰ্যসুচীত বিভিন্ন ক্ৰীড়া কৌশল আৰু সাংস্কৃতিক অনুষ্ঠান পৰিবেশ কৰা হয় ৷
অনুষ্ঠানত ৰাজিৰঙা ৰাষ্ট্ৰীয় উদ্যান ও বাঘ্ৰ সংৰক্ষিত বনাঞ্চলৰ সঞ্চালক যতীন্দ্ৰ শৰ্মা, ডি এফ অ’ ৰমেশ কুমাৰ গগৈ, পৌৰপতি ৰত্নেশ্বৰ বৰুৱাৰ উপৰিও স্থানীয় জেষ্ঠ নাগৰিক সকল উপস্থিত থাকে ৷
উল্লেখ্য যে ৭৬ সংখ্যক স্বাধীনতা দিৱসৰ লগত সংগতি ৰাখি সম্বৰ্ধনা জনাব লগা বোকাখাতৰ সমাজ জীৱনৰ বিভিন্ন ক্ষেত্ৰলৈ অৱদান আগবঢ়োৱা ব্যক্তি সকলৰ নামো এই অনুষ্ঠানতে ঘোষণা কৰা হয় ৷ এই বিশিষ্ট ব্যক্তি সকলক অহা ১৭ আগষ্টত সম্বৰ্ধনা জনোৱা হ’ব বুলিও ঘোষণা কৰে মহকুমা প্ৰশাসনে ৷
অনুষ্ঠানৰ শেষত বোকাখাতৰ ছহিদ কমলা মিৰি অসামৰিক চিকিৎসালয়ৰ ৰোগী, অনাথ আশ্রমৰ উপৰিও উজনি অসম বিকলাঙ্গ কেন্দ্ৰৰ ছাত্ৰ-ছাত্ৰীৰ মাজত ফলমূল বিতৰণ কৰা হয় ৷
বিয়লিলৈ স্বাধীনতা দিৱস উপলক্ষে স্থানীয় সাংবাদিক আৰু বোকাখাত জিলা ক্ৰীড়া সন্থাৰ মাজত এক প্রীতি ফুটবল খেলো অনুষ্ঠিত হয় ।
