ইংলেণ্ড-ভাৰত টেষ্ট শৃংখলাৰ চলি থকা তৃতীয়খন টেষ্টৰ দ্বিতীয় দিনৰ আৰম্ভণিৰ পৰাই লৰ্ডছত যশপ্ৰীত বুমৰাহৰ আধিপত্য আৰম্ভ হৈছিল। ইংলেণ্ডৰ প্ৰাক্তন অধিনায়ক জো ৰুটে প্ৰথম দিনাই ৯৯ ৰানত অপৰাজিত আছিল। কিন্তু দ্বিতীয় দিনা শতক অৰ্জন কৰিও তেওঁ নিজৰ ইনিংছ আগবঢ়াব নোৱাৰিলে। তেওঁক ১০৪ ৰানতে বুমৰাহে ক্লীন বোল্ড কৰে।
লৰ্ডছ টেষ্টৰ প্ৰথম দিনটোত ইংলেণ্ডে ৪ উইকেট হেৰুৱাই ২৫১ ৰান সংগ্ৰহ কৰে। যিটো তেওঁলোকৰ বাবে কেতিয়াও যথেষ্ট নাছিল। প্ৰথম দিনা বুমৰাহে মাত্ৰ এটা উইকেট দখল কৰে। কিন্তু দ্বিতীয় দিনৰ আৰম্ভণিৰ পৰাই দমনীয় প্ৰদৰ্শন আৰম্ভ কৰে। অৱশ্যে ভাৰতে পুৱাৰ ভাগত আৰম্ভ কৰিলেও ইংলেণ্ডে দিনটোৰ শেষত ভালেই স্কোৰ কৰে।
বুমৰাহে ৫টা উইকেট দখল কৰে যদিও বাকী বলাৰসকলৰ পৰা তেনেকৈ সহযোগ নাপালে। ফলত ইংলেণ্ডৰ ইনিংছ ২৭১ ৰানত থৰকবৰক হোৱাৰ পাছতো ৩৮৭ ৰানত অন্ত পৰে।
চাৰি বছৰৰ পাছত ইংলেণ্ডৰ হৈ টেষ্টলৈ উভতি আহিছে পেচাৰ জোফ্ৰা আৰ্চাৰ। কিন্তু তেওঁ এই দিনটোত প্ৰথমতে ঘাতক হৈ পৰে। আৰ্চাৰে ফৰ্মত থকা যশস্বী জয়ছৱালক ঘূৰাই পঠিয়ায় (১৩)। তাৰ পিছত তিনি নম্বৰত নমা কৰুণ নায়াৰক লগত লৈ কে এল ৰাহুলে দলৰ ৰান আগুৱাই লৈ যায়।
প্ৰথম দুখন মেচত ব্যৰ্থ হয় নায়াৰ। যেতিয়াই তেওঁ ফৰ্মলৈ ঘূৰি অহা যেন লাগিছিল, তেতিয়াই ইংলেণ্ডৰ অধিনায়ক বেন ষ্ট’কে তেওঁক আউট কৰে। ৪০ ৰানত আউট হয় নায়াৰ। দুৰ্দান্ত ফৰ্মত থকা ভাৰতীয় অধিনায়ক শুভান গিলেও টিকি থকাত ব্যৰ্থ হয়। ক্ৰীছ ৱ’কেছে তেওঁক ১৬ ৰানত আউট কৰে। প্ৰথম দিনাই ঋষভ পন্তে আঙুলিত আঘাত পাইছিল। দ্বিতীয় দিনা ধ্ৰুৱ জুৰেলক তেওঁৰ ঠাইত উইকেটকীপাৰ হিচাপে দেখা যায়। কিন্তু হাতত আঘাত পাইও বেটিং কৰি আছে পন্ত। দ্বিতীয় দিনৰ শেষত ৩৩টা বলত ১৯ ৰান সংগ্ৰহ কৰি অপৰাজিত হৈ আছে ঋষভ। ৰাহুলে ৫৩ ৰানত অপৰাজিত হৈ ক্ৰীজ এৰিছে। ভাৰতৰ ৰান ৩ উইকেটত ১৪৫ ৰান। প্ৰথম ইনিংছত ২৪২ ৰান পিছ পৰি আছে টিম ইণ্ডিয়া।
