শুই ভালপোৱা সকলৰ বাবে ভাৰতৰ এটা নতুন প্ৰতিষ্ঠানে ইণ্টাৰ্ণশ্বিপৰ সুবিধা আগবঢ়াইছে।
শ্লিপ চল্যুশ্যন ষ্টাৰ্টআপ ‘ৱেকফিটে’ তেওঁলোকৰ ‘শ্লিপ ইণ্টাৰ্ণশ্বিপ-২০২০’ৰ বাবে প্ৰাৰ্থীৰ পৰা আৱেদন বিচাৰিছে।
প্ৰতিষ্ঠানটোৱে ইয়াৰ বাবে তেওঁলোকৰ ৱেবচাইটত বিজ্ঞাপন প্ৰকাশ কৰি সমগ্ৰ দেশৰ প্ৰাৰ্থীৰ পৰা আবেদনো বিচাৰিছে।
প্ৰচুৰ টোপনি যাব পৰা যোগ্যতাৰ অধিকাৰীসকলে এই ইণ্টাৰ্ণশ্বিপৰ বাবে আবেদন কৰিব পাৰে।
প্ৰতিষ্ঠানটোৱে টোপনি যোৱাৰ সময়ত প্ৰাৰ্থীসকলে পৰিধান কৰিবলগীয়া পোছাক ‘পাইজামা’ হ’ব বুলিও নিৰ্ধাৰণ কৰি দিছে।
ইণ্টাৰ্ণশ্বিপৰ বাবে যোগ্য বিৱেচিত প্ৰাৰ্থীসকলে প্ৰতি নিশা ৯ ঘণ্টাকৈ ১০০ দিনৰ বাবে টোপনি যাব লাগিব যাৰ বাবে তেওঁলোকক ১ লাখ টকাৰ ভাত্তা আগবঢ়োৱা হ’ব।
‘‘আমি দেশৰ ভিতৰত ভালকৈ টোপনি যাব পৰা লোকক নিৰ্বাচন কৰিব বিচাৰিছো যিসকলে তেওঁলোকৰ জীৱনত টোপনিকে অগ্ৰাধিকাৰ দি আহিছে। সুস্বাস্থ্যৰ বাবে টোপনিৰ প্ৰয়োজনীয়তাৰ প্ৰতি সজাগতা সৃষ্টিৰ বাবে এই ইণ্টাৰ্ণশ্বিপটো মুকলি কৰা হৈছে’’, ৱেকফিট ডট কোৰ প্ৰতিষ্ঠাতা আৰু নিৰ্দেশক গৰাকীয়ে এনেদৰে কয়।
আনহাতে, ইণ্টাৰ্ণশ্বিপৰ সময়ত প্ৰতিষ্ঠানটোৱে টোপনিৰ ধৰণ আৰু শৈলীৰ বিষয়ে পৰ্যালোচনা কৰিব।
বিচনালৈ যোৱাৰ পূৰ্বে প্ৰাৰ্থীসকলক টোপনিৰ বিষয়ে বিভিন্ন পৰামৰ্শ আগবঢ়োৱা হ’ব যাতে তেওঁলোকে বিচনালৈ গৈ ভালদৰে টোপনি যাব পাৰে।
এই পদক্ষেপৰ দ্বাৰা প্ৰতিজন নাগৰিকৰ কৰ্মময় জীৱনত টোপনিৰ প্ৰয়োজনীয়তাক অভিন্ন অংগ হিচাপে প্ৰমাণ কৰিব বিচৰা হৈছে বুলি প্ৰতিষ্ঠানটোৰ নিৰ্দেশক গৰাকীয়ে কয়।
