গুজৰাটৰ পিৰানাৰ প্লাষ্টিকৰ আৱৰ্জনাৰ পাহাৰত আাৱিস্কাৰ হৈছে এবিধ প্লাষ্টিক খোৱা বেক্টেৰীয়া। প্ৰথমবাৰৰ বাবে প্লাষ্টিক খোৱা বেক্টেৰিয়া আৰু ভেঁকুৰৰ আৱিষ্কাৰ কৰি ভাৰতীয় বিজ্ঞানীসকলে বিশ্ববাসীক আচৰিত কৰি তুলিছে।
এই বেক্টেৰীয়া আৰু ভেঁকুৰৰ বাণিজ্যিকীকৰণ হ’লে ভাৰত আৰু বিশ্বই বৰ্তমান সন্মুখীন হোৱা প্লাষ্টিক আৱৰ্জনা আৰু প্ৰদূষণৰ সমস্যাৰ পৰা পৰিত্ৰাণ পাব বুলি ধাৰণা কৰা হৈছে।
এই বেক্টেৰিয়া আৰু ভেঁকুৰে বৰ্তমান মুকলি বতাহত পেলোৱা প্লাষ্টিকৰ জাবৰবোৰ পৰিষ্কাৰ কৰিব বুলি আশা কৰা হৈছে। প্লাষ্টিক এই জীৱবোৰৰ খাদ্যৰ প্ৰাকৃতিক উৎস নহ’লেও বিজ্ঞানীসকলে আৱিষ্কাৰ কৰিছে যে মিউটেশ্যনৰ ফলত ইহঁতৰ আচৰণ পৰিৱৰ্তন কৰিব পৰা যাব।
খবৰ অনুসৰি গুজৰাট বায়’টেকন’লজি ৰিচাৰ্চ চেণ্টাৰ (জিবিআৰচি)ৰ দুজন গৱেষক – প্ৰতিষ্ঠানটোৰ সঞ্চালক অধ্যাপক চৈতন্য যোশী আৰু যুটীয়া সঞ্চালক ড০ মাধৱী যোশীয়ে আই আই টি গান্ধীনগৰ (আই আই টি-জি এন)ৰ অধ্যাপক মনীষ কুমাৰৰ সৈতে মিলি ‘Landfill microbiome harbours plastic-degrading gene: A metagenomics study of solid waste management.’’ শীৰ্ষক এটা প্ৰবন্ধ লিখিছিল।
ভাৰতীয় বিজ্ঞানীসকলে গুজৰাটৰ কেইবাটাও কঠিন আৱৰ্জনা ব্যৱস্থাপনা (SWM) স্থানৰ নমুনা বিশ্লেষণ কৰি প্লাষ্টিক খোৱা ১৭টা শ্ৰেণীৰ বেক্টেৰিয়া আৰু ৯টা ভেঁকুৰ আৱিষ্কাৰ কৰিছে।
বিশেষজ্ঞসকলে উল্লেখ কৰে যে অণুজীৱবোৰৰ জিন’ম ক্ৰমত উপস্থিত থকা কেইবাটাও এনজাইমে দেখুৱাইছে যে প্লাষ্টিক পদাৰ্থবোৰ কাৰ্বন আৰু শক্তিৰ উৎস হিচাপে ব্যৱহাৰ কৰা হৈছে। গৱেষণা পত্ৰখনত প্ৰকাশ পাইছে যে বেক্টেৰিয়াবোৰে পানীৰ উপস্থিতিত অক্সিডাইজেচনৰ পিছত প্লাষ্টিক পলিমাৰৰ পৃষ্ঠত নিজকে সংলগ্ন কৰি লয়, তাৰ পিছত ইহঁত পি ই, পি ই টি বা পি এছলৈ বিভাজিত হ’বলৈ আৰম্ভ কৰে।
