নেপালৰ প্ৰধান মন্ত্ৰী কে পি শৰ্মা অ’লিয়ে বুধবাৰে ভাৰতৰ প্ৰধান মন্ত্ৰী নৰেন্দ্ৰ মোদীক অত্যাৱশ্যকীয় ঔষধ যোগান ধৰাৰ বাবে ধন্যবাদ জ্ঞাপন কৰে।
ভাৰতে ক’ৰ’না ভাইৰাছৰ সংক্ৰমণ ৰোধ কৰাৰ বাবে নেপাললৈ ২৩ টন প্ৰয়োজনীয় ঔষধৰ যোগান ধৰিছে।
‘‘মই প্ৰধান মন্ত্ৰী নৰেন্দ্ৰ মোদীক কোভিদ-১৯-ৰ বিৰুদ্ধে যুঁজাৰ বাবে অত্যাৱশ্যকীয় ২৩ টন ঔষধেৰে সহায় কৰা বাবে ধন্যবাদ জ্ঞাপন কৰিছো। ঔষধখিনি ভাৰতীয় ৰাষ্ট্ৰদূতে নেপালৰ স্বাস্থ্য আৰু পৰিয়ালকল্যাণ মন্ত্ৰ্যালয়ৰ হাতত অৰ্পন কৰে,’’ কে পি শৰ্মা অ’লিয়ে এইদৰে টুইট কৰে।
ভাৰতৰ নেপালত থকা ৰাষ্ট্ৰদূত বিনয় মোহন কৱাটৰাই ভাৰতে সহায় হিচাপে আগবঢ়োৱা ঔষধখিনি নেপালৰ স্বাস্থ্য মন্ত্ৰী ভানুৱাকান্ত ধাকালৰ হাতত অৰ্পন কৰে।
ভাৰতৰ জনসাধাৰণৰ তৰফৰ পৰা নেপালৰ জনসাধাৰণলৈ ৩.২ লাখ পেৰাচিটেমল আৰু ২.৫ লাখ হাইড্ৰ’ক্সিক্লৰ’কুইনকে ধৰি মুঠ ৮.২৫ লাখ অত্যাৱশ্যকীয় ঔষধ প্ৰেৰণ কৰে।
ভাৰতৰ প্ৰধান মন্ত্ৰী নৰেন্দ্ৰ মোদীয়ে ১৫ এপ্ৰিলত ছাৰ্ক দেশৰ প্ৰতিনিধি সকলৰ সৈতে হোৱা বৈঠকত ভাৰতে সকলো ওচৰ চুবুৰীয়া দেশলৈ প্ৰয়োজনীয় সহায় আগবঢ়াব বুলি সদৰি কৰিছিল।
মোদীয়ে বৈঠকত ভাৰতে ছাৰ্কৰ কোভিদ-১৯ জৰুৰীকালীন পুজিলৈ ১০ মিলিয়ন ডলাৰ আগবঢ়োৱাৰ কথাও ঘোষণা কৰিছিল।
