ভাৰতত ৫০০ মিলিয়নতকৈ অধিক সক্ৰিয় ইণ্টাৰনেট ব্যৱহাৰকাৰী আছে : গুগল ইণ্ডিয়াৰ প্ৰধান
গুগল ইণ্ডিয়াৰ প্ৰধান সঞ্জয় গুপ্তাই সোমবাৰে ভাৰতত বৰ্তমান ৫০০ মিলিয়ন সক্ৰিয় ইণ্টাৰনেট ব্যৱহাৰকাৰী আছে বুলি মন্তব্য প্ৰকাশ কৰে।
‘গুগল ফৰ ইণ্ডিয়া’ শীৰ্ষক কাৰ্য্যক্ৰমত অংশগ্ৰহণ কৰি সঞ্জয় গুপ্তাই লগতে কয় যে, ভাৰতত এই সময়ত মুঠ ৪৫০ মিলিয়ন লোকে মোবাইল ফোনৰ জৰিয়তে ইণ্টাৰনেট সেৱা ব্যৱহাৰ কৰে।
গুগলৰ মুখ্য কাৰ্য্যবাহী সুন্দৰ পিচায়ে ভাৰতত উপলব্ধ হোৱা কম মূল্যৰ স্মাৰ্ট ফোন আৰু বহনক্ষম ডাটাৰ লগতে বিশ্ব মানৰ টেলিকম আন্তঃগাঠনিৰ বাবে ডিজিটেল ইণ্ডিয়াৰ ক্ষেত্ৰত নতুন দিগন্তৰ সূচনা হৈছে বুলি কয়।
গুগলৰ মুখ্য কাৰ্য্যবাহী সুন্দৰ পিচায়ে আজি গুগলে ভাৰতত নতুনকৈ ৭৫,০০০ কোটি টকা বিনিয়োগ কৰিব বুলি ঘোষণা কৰে।
পিচায়ে প্ৰধান মন্ত্ৰী নৰেন্দ্ৰ মোদীৰ সৈতেও বাৰ্তালাপত অংশগ্ৰহণ কৰে আৰু প্ৰধান মন্ত্ৰীৰ ডিজিটেল ইণ্ডিয়াৰ প্ৰতি থকা ইচ্ছাৰ বাবে ধন্যবাদ জ্ঞাপন কৰে।
প্ৰধান মন্ত্ৰীয়ো পিচায়ৰ সৈতে ক’ৰ’নাৰ সংক্ৰমণৰ সময়ত নতুন কৰ্মসংস্কৃতি সম্পৰ্কত কথা পাতে আৰু গুগলৰ ভাৰতত বিনিয়োগৰ ইচ্ছাৰ বাবে ধন্যবাদ জনায়।