সমগ্ৰ দেশৰ লগতে আজি নগাঁওতো আজি প’ষ্ট পেমেণ্ট বেংক (India Post payment bank)ৰ শুভাৰম্ভ কৰা হয়। এই উপলক্ষে নগাঁও প্ৰধান ডাকঘৰত অনুষ্ঠিত অনুষ্ঠানত অংশগ্ৰহণ কৰি কেন্দ্ৰীয় ৰেল ৰাজ্য মন্ত্ৰী ৰাজেন গোহাঁইয়ে কয়, ‘এতিয়াৰ পৰা এই বেংকিং সেৱাৰ জৰিয়তে ৰাইজ বেংকিং সেৱাৰ পৰা বঞ্চিত নহয়। ভিতৰুৱা গাঁৱৰ লোকেও এই বেংকিং সেৱাৰ পৰা উপকৃত হ’ব পাৰিব।’
‘ইয়াতকৈ আৰু ডাঙৰ সুবিধা একো নাই’ বুলি উল্লেখ কৰি গোহাঁইয়ে প্ৰধানমন্ত্ৰী নৰেন্দ্ৰ মোদীৰ ডিজিটেল ইণ্ডিয়াৰ সপোন বাস্তৱত ৰূপায়িত হৈছে বুলি উল্লেখ কৰে।
নগাঁও প্ৰধান ডাকঘৰৰ মুখ্য প্ৰবন্ধক কমল মাহাতুয়ে উদ্দেশ্য বাখ্যা কৰা উক্ত সভাত আদৰণি ভাষণ প্ৰদান কৰে ডাক বিভাগৰ ডিব্ৰুগড় আঞ্চলিক কাৰ্যালয়ৰ মুখ্য প্ৰবন্ধক চুম কামেই।
সভাত নগাঁও সদৰ সমষ্টিৰ বিধায়ক ৰূপক শৰ্মা উপস্থিত থাকি এই বেংকিং সেৱায়ে জনসাধাৰণক লাভৱান কৰিব বুলি উল্লেখ কৰে। জিলাখনৰ ডাক বিভাগৰ বিভিন্ন অঞ্চলৰ বিষয়া-কৰ্মচাৰী উপস্থিত থকা সভাখনত আজি দিল্লীত প্ৰধানমন্ত্ৰী নৰেন্দ্ৰ মোডীৰ জৰিয়তে এই আচঁনিৰ শুভ উদ্বোধন হোৱা সময়তে নগাঁৱতো এই আচঁনিৰ শুভ উদ্বোধন হোৱা সময়ত পজেক্টৰৰ জৰিয়তে নৰেন্দ্ৰ মোদীৰ ভাষণো প্ৰদৰ্শন কৰা হয়।
