কৰ’নাত বিপৰ্যস্ত দেশ! যোৱা ২৪ ঘন্টাত আক্ৰান্ত ৩ লাখ ১৪ হাজাৰ; ২হাজাৰ ১০৪ জনৰ মৃত্যু
মাৰাত্মক কৰ’না ভাইৰাছৰ সংক্ৰমণৰ ফলত সাংঘাতিক বিপৰ্যয়ৰ সন্মুখীন হৈছে ভাৰত। দেশত কৰ’নাৰ সংক্ৰমণে এনেদৰে বৃদ্ধিপাইছে যে ই দৈনিক সংক্ৰমণৰ ক্ষেত্ৰত আমেৰিকাৰ ৰেকৰ্ডো ভংগ কৰিলে।
যোৱা ২৪ ঘন্টাত দেশত এদিনত সৰ্বাধিক আক্ৰান্তৰ ৰেকৰ্ড হৈছে। বুধবাৰে বিশ্বৰ সকলো ৰেকৰ্ড ভংগ কৰি প্ৰায় ৩লাখ ১৪হাজাৰ লোক কৰ’নাত আক্ৰান্ত হৈছে।
দেশত কৰ’না ভাইৰাছৰ সংক্ৰমণ ঘটাৰ পাছত এই প্ৰথমবাৰ দৈনিক আক্ৰান্তৰ সংখ্যাই ৩লাখ অতিক্ৰম কৰিলে।
কেন্দ্ৰীয় স্বাস্থ্য মন্ত্ৰ্যালয়ৰ তথ্য অনুসৰি বিগত ২৪ ঘন্টাত দেশত ৩লাখ ১৪হাজাৰ ৮৩৫জন লোক কৰ’নাত আক্ৰান্ত হৈছে। এয়া দৈনিক সংক্ৰমণৰ ক্ষেত্ৰত বিশ্বৰ ভিতৰতে সৰ্বাধক।
উল্লেখ্য যে ইয়াৰ পূৰ্বে চলিত বছৰৰ যোৱা ৮জানুৱাৰীত আমেৰিকাত এদিনত সৰ্বাধিক ৩লাখ ৭হাজাৰ ৫৮১জন লোক আক্ৰান্ত হৈছিল। ভাৰতে সেই ৰেকৰ্ড ভংগ কৰিলে।
যোৱা ৪এপ্ৰিলত দেশত ২৪ঘন্টাত আক্ৰান্ত হৈছিল ১লাখ লোক। কিন্তু মাত্ৰ ১৭দিনৰ মূৰত আক্ৰান্তৰ সংখ্যা অতি দ্ৰুতভাৱে বৃদ্ধি পাই ৩লাখ অতিক্ৰম কৰিলে।
দেশত দৈনিক আক্ৰান্তৰ হাৰ ৬.৭৬শতাংশ গতিতি বৃদ্ধি পাইছে যিটো আমেৰিকাতকৈ চাৰিগুণ অধিক।
বিগত ২৪ ঘন্টাত দেশত ২হাজাৰ ১০৪জন লোকৰ কৰ’নাত মৃত্যু হৈছে। দেশত এতিয়া মুঠ মৃত্যুৰ সংখ্যা ১লাখ ৮৪হাজাৰ ৬৫৭জনলৈ বৃদ্ধি পাইছে।
সেইদৰে দেশত মুঠ আক্ৰান্ত সংখ্যা হৈছেগৈ ১কোটি ৫৯লাখ ৩০হাজাৰ ৯৬৫জন।