দেশত কৰ’নাৰ তৃতীয় ঢৌৰ আশংকাৰ মাজতে যোৱা ২৪ ঘন্টাত পুনৰ সংক্ৰমণৰ গতি নিম্নগামী হোৱা দেখা গ’ল। সেইদৰে হ্ৰাস পালে দৈনিক মৃত্যুৰ ঘটনাও।
শুকুৰবাৰে কেন্দ্ৰীয় স্বাস্থ্য মন্ত্ৰ্যালয়ে প্ৰকাশ কৰা তথ্য অনুসৰি যোৱা ২৪ ঘণ্টাত দেশত মুঠ ক’ৰ’নাত আক্ৰান্ত হৈছে ৩৮ হাজাৰ ৯৪৯ জন লোক। বৃহস্পতিবাৰে দেশত মুঠ ক’ৰ’নাত আক্ৰান্ত হৈছিল ৪১ হাজাৰতকৈয়ো অধিক লোক।
সেইদৰে, বৰ্তমান দেশত মুঠ কৰ’না আক্ৰান্ত ৰোগীৰ সংখ্যা হৈছে ৩কোটি ১০ লাখ ২৬হাজাৰ ৮২৯ জন।
আনহাতে, যোৱা ২৪ ঘণ্টাত দেশত ৫৪২ জন কোভিড আক্ৰান্ত লোকৰ মৃত্যু হৈছে।
মন্ত্ৰ্যালয়ে প্ৰকাশ কৰা অনুসৰি দেশত এতিয়ালৈকে মুঠ কৰ’না আক্ৰান্ত মৃত্যুৰ সংখ্যা হৈছেগৈ ৪লাখ ১২ হাজাৰ ৫৩১জন।
দেশত যোৱা ২৪ ঘন্টাত সুস্থ হৈ ঘৰলৈ ওভতা ৰোগীৰ সংখ্যা হৈছে ৪০ হাজাৰ ২৬ জন। সুস্থতাৰ হাৰ হৈছে ৯৭.২৮শতাংশ।
সেইদৰে, দেশত এতিয়ালৈকে মুঠ কৰ’নাৰ পৰা আৰোগ্য লাভ কৰা ৰোগীৰ সংখ্যা হৈছে ৩ কোটি ১লাখ ৮৩ হাজাৰ ৮৭৬ জন।
দেশত বৰ্তমান সক্ৰিয় ৰোগীৰ সংখ্যা হৈছে ৪লাখ ৩০হাজাৰ ৪২২জন।
ইপিনে, দেশত এতিয়ালৈকে ৩৯কোটি ৫৩ লাখ ৪৩হাজাৰ ৭৬৭জনক কৰ’নাৰ ভেকচিন প্ৰদান কৰা হৈছে। যোৱা ২৪ ঘন্টাত ভেকচিন প্ৰদান কৰা হৈছে ৩৮লাখ ৭৮হাজাৰ ৭৮জন লোকক।
দেশত কৰ’নাৰ তৃতীয়টো ঢৌ আৰু ডেল্টা প্লাছ প্ৰজাতিৰ সংক্ৰমণ আৰু জিকা ভাইৰাছৰ আতংকই উদ্বিগ্নতা বৃদ্ধি কৰি ৰাখিছে।
আনহাতে, বৃহস্পতিবাৰে বিশ্ব স্বাস্থ্য সংস্থাৰ মুৰব্বী টেড্ৰ’ছ অধানাম গেব্ৰিয়াছুছে সদৰী কৰে যে বিশ্বত ইতিমধ্যে কৰ’নাৰ তৃতীয় ঢৌ আৰম্ভ হৈ গৈছে।
স্বাভাৱিকতে দেশত কৰ’না পৰিস্থিতিয়ে পুনৰ জটিল ৰূপ ধাৰণ কৰাৰ আশংকা প্ৰকাশ কৰিছে বিশেষজ্ঞসকলে।
