চীন নহয়, ভাৰত এতিয়া বিশ্বৰ আটাইতকৈ জনবহুল দেশ। ৰাষ্ট্ৰসংঘৰ জনসংখ্যা পুঁজি সংস্থা বা UNFPA ৰ প্ৰতিবেদনত এই কথা দাবী কৰা হৈছে। বাতৰি অনুসৰি ভাৰতত বৰ্তমান চীনতকৈ ২৯ লাখ বেছি লোক আছে। বুধবাৰে প্ৰকাশ পোৱা UNFPA ৰ ‘দ্য ষ্টেট অৱ ৱৰ্ল্ড পপুলেচন ৰিপ’ৰ্ট, ২০২৩’ অনুসৰি ভাৰতৰ বৰ্তমানৰ জনসংখ্যা ১৪২ কোটি ৮৬ লাখ। আনহাতে, চীনৰ জনসংখ্যা ১৪২ কোটি ৫৭ লাখ। অৰ্থাৎ ভাৰতৰ জনসংখ্যা এতিয়া চীনতকৈ ২৯ লাখ বেছি।
উল্লেখ্য যে ১৯৫০ চনত ৰাষ্ট্ৰসংঘই জনসংখ্যাৰ তথ্য সংগ্ৰহ কৰিবলৈ আৰম্ভ কৰিছিল। তাৰ পিছত প্ৰথমবাৰৰ বাবে ভাৰতে চীনৰ জনসংখ্যাক অতিক্ৰম কৰিলে।
লগতে পঢ়ক: থলুৱা লোকৰ বাবে চৰকাৰী চাকৰিত লাগে ১০০ শতাংশ সংৰক্ষণ
ৰাষ্ট্ৰসংঘৰ তথ্য অনুসৰি যোৱা বছৰ চীনে জনসংখ্যাৰ শিখৰত উপনীত হৈছিল। কিন্তু তেতিয়াৰ পৰাই তেওঁলোকৰ দেশৰ জনসংখ্যা কমিবলৈ আৰম্ভ কৰিছে।
ইয়াৰ বিপৰীতে ভাৰতৰ জনসংখ্যা বৃদ্ধি পাইছে। কিন্তু ১৯৮০ চনৰ পৰা ভাৰতৰ জনসংখ্যা বৃদ্ধিৰ হাৰ হ্ৰাস পাই আহিছে। UNFPAৰ প্ৰতিবেদন অনুসৰি ভাৰতৰ ২৫ শতাংশ জনসংখ্যা ০ৰ পৰা ১৪ বছৰৰ ভিতৰত, ১৮ শতাংশ নাগৰিক জনসংখ্যাৰ ১০ৰ পৰা ১৯ বছৰৰ ভিতৰত, ২৬ শতাংশ লোক ১০ৰ পৰা ২৪ বছৰৰ ভিতৰৰ, ৬৮ শতাংশ লোকৰ বয়স ১৫ আৰু ৬৪ৰ ভিতৰত আৰু দেশৰ জনসংখ্যাৰ মাত্ৰ ৭ শতাংশ৬৫ বছৰৰ ওপৰৰ।
আনহাতে, চীনত ০ৰ পৰা ১৪ বছৰৰ ভিতৰৰ নাগৰিকৰ সংখ্যা ১৭ শতাংশ, ১০ৰ পৰা ১৯ বছৰৰ ভিতৰৰ নাগৰিকৰ সংখ্যা ১২ শতাংশ, ১০ৰ পৰা ২৪ বছৰৰ ভিতৰৰ লোকৰ সংখ্যা ১৮ শতাংশ, ১৫ৰ পৰা ৬৪ বছৰৰ ভিতৰৰ লোকৰ সংখ্যা ৬৯ শতাংশ, আৰু দেশৰ ১৪ শতাংশ জনসংখ্যা ৬৫ বছৰৰ ওপৰৰ। অৰ্থাৎ সেই দেশৰ ২০ কোটি লোকৰ বয়স ৬৫ বছৰৰ ওপৰত।
লগতে পঢ়ক: নাৰী শক্তি : শাৰী পিন্ধি দৌৰিলে ৪২ কিলোমিটাৰ, ৪১ বছৰীয়া শিক্ষয়িত্ৰীয়ে
সেইদৰে, চীনৰ নাগৰিকৰ গড় বয়স ভাৰততকৈ বহু বেছি। চীনত গড়ে মহিলাৰ বয়স ৮২ বছৰ, পুৰুষৰ বয়স ৭৬ বছৰ। ইপিনে, ভাৰতত মহিলাসকলৰ গড় বয়স ৭৪ বছৰ আৰু পুৰুষৰ বয়স ৭১ বছৰ। তদুপৰি, ভাৰতৰ জনসংখ্যাৰ অধিকাংশই যুৱক-যুৱতী হোৱাৰ ফলত ভাৰতৰ অৰ্থনীতিত সহায়ক হ’ব বুলি আশা কৰা হৈছে। কিন্তু চীনৰ ক্ষেত্ৰত জনসংখ্যাৰ এক বৃহৎ অংশ বৃদ্ধাৱস্থাৰ বাবে ইয়াক দেশৰ অৰ্থনীতিৰ ওপৰত এক ডাঙৰ বোজা বুলি গণ্য কৰা হয়।
