দূৰণিবটীয়া ৰে’লৰ সংৰক্ষিত ডবাত বাহিৰৰ লোক উঠি পৰাটো ভাৰতীয় ৰে’লৱেত এক সাধাৰণ ঘটনা। প্ৰায়বোৰ ৰে’ল যাত্ৰীৰ এনে অভিজ্ঞতা আছে। ইয়াৰ বাবেই চুৰি হোৱাটোও নতুন কথা নহয়। বেছিভাগ যাত্ৰীয়ে সুকলমে ঘৰলৈ উভতিহে স্বস্তিৰ নিশ্বাস পেলায়। অৱশ্যে ৰাষ্ট্ৰীয় গ্ৰাহক সুৰক্ষা আদালতে তেনে এক ঘটনাত কৰ্তব্যত গাফিলতিৰ অভিযোগত ৪.৭ লাখ টকাৰ জৰিমনা বিহিলে ৰে’লৱেক। দৰাচলতে কি ঘটিছিল?
ঘটনাটো ২০১৭ চনৰ ৯ মে’ৰ অমৰকণ্টক এক্সপ্ৰেছৰ। দিলীপ কুমাৰ চতুৰ্বেদীয়ে পৰিয়ালৰ সৈতে কাটনীৰ পৰা দুৰ্গলৈ শ্লীপাৰ কোচত গৈ আছিল। তেওঁৰ লাগেজত কমেও ৯.৩ লাখ টকাৰ সামগ্ৰী আছিল। এসময়ত ট্ৰেইনত তেওঁৰ টোপনি আহিল। সাৰ পাই দেখে যে তেওঁৰ বেগটো নাই।
নিয়ম অনুসৰি ৰে’ল আৰক্ষীত এফআইআৰ দাখিল কৰে। কিন্তু আৰ পি এফে বেগটো উদ্ধাৰ কৰাত ব্যৰ্থ হয়। ইয়াৰ পিছত তেওঁ দুৰ্গ জিলা গ্ৰাহক সুৰক্ষা আয়োগত গোচৰ ৰুজু কৰে।
সংশ্লিষ্ট ৰে’ল বিষয়াসকলক ক্ষতিপূৰণ দিয়াৰ নিৰ্দেশ দিয়ে আয়োগে। অৱশ্যে এই নিৰ্দেশক প্ৰত্যাহ্বান জনাই ৰাজ্যিক গ্ৰাহক সুৰক্ষা আদালতৰ কাষ চাপিছিল ৰে’লৱেই। য’ত জিলা গ্ৰাহক আদালতৰ নিৰ্দেশ বাতিল কৰা হয়।
ৰে’ল যাত্ৰী দিলীপে পুনৰ ৰাষ্ট্ৰীয় গ্ৰাহক সুৰক্ষা আদালতৰ কাষ চাপে। যোৱা সোমবাৰে আদালতে এই চুৰিৰ বাবে ৰে’লৱে দায়ী বুলি আৰু ৰে’ল কৰ্মীসকলে গাফিলতি কৰা বুলি নিৰ্দেশ দিয়ে। ৰে’ল কক্ষত থকা টিকট পৰীক্ষকে নিজৰ কৰ্তব্য পালন নকৰিলে। তেওঁৰ গাফিলতিৰ বাবেই সংৰক্ষিত ডবাত উঠি বহিল বাহিৰৰ লোক। ইয়াৰ বাবেই দূৰণিবটীয়া ৰে’লখনৰ যাত্ৰীজনৰ লাগেজ চুৰি হৈ যায়। ইয়াৰ বাবেই ৰে’লৱেক ৪ লাখ ৭০ হাজাৰ টকাৰ জৰিমনা বিহা হৈছে।
