দেশৰ উচ্চতম ন্যায়ালয়ৰ প্ৰথমগৰাকী মহিলা ন্যায়াধীশৰ দেহাৱসান ঘটিছে। তেওঁ ন্যায়াধীশ ফাতিমা বিবি। মৃত্যুৰ সময়ত তেওঁৰ বয়স আছিল ৯৬ বছৰ। আনহাতে, তেওঁ আছিল প্ৰথমগৰাকী মুছলমান মহিলা ন্যায়াধীশো। ভাৰতৰ প্ৰায় ৭ দশকৰ ইতিহাসত এতিয়ালৈকে এনে মাত্ৰ ৮ গৰাকী মহিলাইহে ন্যায়পালিকাত যোগদান কৰিছে।
১৯২৭ চনৰ ৩০ এপ্ৰিলত কেৰালাত জন্মগ্ৰহণ কৰিছিল ফাতিমা বিবি। ডাঙৰ হোৱাৰ পিছত দেউতাকে তেওঁক আইন পঢ়িবলৈ পৰামৰ্শ দিছিল। ১৯৫০ চনত বাৰ কাউন্সিলৰ পৰীক্ষাত তেওঁ শীৰ্ষস্থান দখল কৰিছিল। আনকি তেওঁ বাৰ কাউন্সিলৰ প্ৰথমগৰাকী মহিলা স্বৰ্ণ পদক বিজয়ী।
লগতে পঢ়কঃ মহুৱা কাণ্ডৰ প্ৰভাৱ! ‘ডিজিটেল সংসদ’ পৰ্টেলত সাংসদ সহায়কৰ ব্যৱহাৰত অনা হ’ল নিয়ন্ত্ৰণ
তেওঁ কেৰালাতেই অধিবক্তা হিচাপে কৰ্মজীৱন আৰম্ভ কৰিছিল। ১৯৭৪ চনত তেওঁ সত্ৰ ন্যায়াধীশ হয়। ১৯৮০ চনত তেওঁ ইনকম টেক্স এপিলেট ট্ৰিব্যুনেলত যোগদান কৰে। ১৯৮৩ চনত তেওঁ উচ্চ ন্যায়ালয়ত ন্যায়াধীশ হিচাপে যোগদান কৰে।
ইয়াৰ কেইবছৰমান পিছতে ফাতিমা বিবিয়ে ইতিহাস ৰচনা কৰে। ১৯৮৯ চনত উচ্চতম ন্যায়ালয়ত ন্যায়াধীশ হিচাপে মনোনীত হয়। ১৯৯২ চনৰ ২৯ এপ্ৰিলত ফাতিমা বিবিয়ে অৱসৰ গ্ৰহণ কৰে। কেৰিয়াৰৰ শেষ দিনটোলৈকে তেওঁ এই পদত কাম কৰি আছিল।
অৱসৰৰ পিছতো তেওঁ কৰ্ম আৰু দায়িত্বৰ পৰা ছুটী লোৱা নাছিল। ৰাষ্ট্ৰীয় মানৱ অধিকাৰ আয়োগৰ মনোনীত সদস্য আছিল। লগতে তামিলনাডুৰ ৰাজ্যপালৰ দায়িত্বও চম্ভালিছিল। অৱশ্যে তেওঁ তামিলনাডুৰ ৰাজ্যপাল পদ ত্যাগ কৰে।
লগতে পঢ়কঃ আধা ঘন্টা পলমকৈ হাজিৰ হৈছিল আদালতত; ২ ঘণ্টাৰ বাবে ঘাঁহ কটাৰ শাস্তি দুই আৰক্ষীক!
উল্লেখ্য যে ৰাজীৱ গান্ধী হত্যাকাণ্ডৰ চাৰি অভিযুক্তই তেওঁৰ ওচৰত দয়াভিক্ষা বিচাৰি আবেদন জনোৱাত তেওঁ তামিলনাডুৰ ৰাজ্যপালৰ পদৰ পৰা পদত্যাগ কৰে।
