দবা বিশ্বকাপৰ ফাইনেলত প্ৰৱেশ কৰিছে ভাৰতীয় দবাৰু ৰমেশ বাবু প্ৰজ্ঞানন্দ। ১৮ বছৰীয়া প্ৰজ্ঞানন্দই টাইব্ৰেকত ৩.৫-২.৫ ব্যৱধানত পৰাস্ত কৰে বিশ্বৰ তিনি নম্বৰ স্থানৰ ফেবিয়ানো কাৰুয়ানাক। ফাইনেলত প্ৰজ্ঞানন্দ মুখামুখি হ’ব মেগনাছ কাৰ্লছনৰ।
বিশ্বনাথন আনন্দে টুইট কৰি এই খবৰ সদৰী কৰে। তেওঁ লিখিছে, ‘প্ৰজ্ঞা ফাইনেললৈ গৈছে। টাইব্ৰেকত ফেবিয়ানো কাৰুয়ানাক পৰাস্ত কৰিছে। ফাইনেলত মেগনাছ কাৰ্লছনৰ বিৰুদ্ধে খেলিব। চমৎকাৰ প্ৰদৰ্শন।’
কোৱাৰ্টাৰ ফাইনেলত মুঠ চাৰিগৰাকী ভাৰতীয় দবা খেলুৱৈয়ে অংশগ্ৰহণ কৰিছিল। ইয়াৰ ভিতৰত কেৱল প্ৰজ্ঞানন্দইহে ছেমি ফাইনেলত প্ৰৱেশ কৰে। শেষৰ চাৰিৰ বাধা অতিক্ৰম কৰাৰ পিছত ভাৰতৰ উদীয়মান দবা খেলুৱৈগৰাকীয়ে ফাইনেলত প্ৰৱেশ কৰিছে।
Pragg goes through to the final! He beats Fabiano Caruana in the tiebreak and will face Magnus Carlsen now.
What a performance!@FIDE_chess #FIDEWorldCup2023
— Viswanathan Anand (@vishy64theking) August 21, 2023
কিন্তু খিতাপ জয় কৰিবলৈ তেওঁৰ সন্মুখত আছে এটা ডাঙৰ বাধা। পৃথিৱীৰ এক নম্বৰ স্থানৰ খেলুৱৈগৰাকী পৰাস্ত কৰিব লাগিব। পাঁচবাৰৰ বিশ্ব চেম্পিয়নগৰাকীৰ পৰা কঠিন প্ৰত্যাহ্বানৰ সন্মুখীন হ’ব উদীয়মান তাৰকাগৰাকী।
অৱশ্যে বিগত সময়ত কাৰ্লছেনক পৰাস্ত কৰাৰ অভিলেখ আছে প্ৰজ্ঞাৰ। গোটেই বিশ্বকে স্তম্ভিত কৰি তুলিছিল প্ৰজ্ঞানন্দই। বিশ্ব চেম্পিয়ন হ’বলৈ হ’লে তেওঁ তাৰ পুনৰাবৃত্তি ঘটাব লাগিব।
