ভাৰতীয় ব্যক্তিগত বিমান পৰিবহন সংস্থা ইণ্ডিগ’ই শনিবাৰে শ্বিলঙৰ পৰা ৩০ কিলোমিটাৰ দূৰত্বত অৱস্থিত উমৰোই বিমানবন্দৰৰ পৰা ক’লকাতা বিমানবন্দৰলৈ যাত্ৰা আৰম্ভ কৰিব।
চৰকাৰী সূত্ৰৰ পৰা প্ৰকাশ কৰা খবৰ অনুসৰি পৰীক্ষামূলক ইণ্ডিগো বিমানখনে উমৰোই বিমানবন্দৰৰ পৰা ক’লকাতালৈ আবেলি ৪ বজাত উৰা মাৰিব।
এই উৰণক কেন্দ্ৰ কৰি বিমান বন্দৰটো বৰ্তমান কঠোৰ পৰীক্ষামূলক নিৰীক্ষণত ৰখা হৈছে।
বৰ্তমান উমৰোই বিমানবন্দৰত ডাঙৰ বিমান অৱতৰণ কৰিব পৰাকৈ উন্নয়ণৰ কাম কৰি থকা হৈছে।
উমৰোই বিমানবন্দৰৰ পৰা ক’লকাতালৈ আৰম্ভ কৰিবলগীয়া উৰণ সম্বন্ধে ইণ্ডিগ’ই নিজৰ টুইটাৰ হেণ্ডলত এনেদৰে লিখে ‘শ্বিলং-ক’লকাতাৰ মাজত আৰম্ভ হ’ল দৈনিক ননষ্টপ বিমান সেৱা’।
জুলাইৰ ২০ তাৰিখৰ পৰা বিমানবন্দৰটোৰ পৰা ক’লকাতালৈ বিমান দৈনিক বিমান সেৱা আৰম্ভ হ’ব।
ইণ্ডিগোই টুইটাৰত এনেদৰে লিখে ‘গৰমৰ পৰা পৰিত্ৰাণ বিচাৰি পূবৰ স্কটলেণ্ড খ্যাত শ্বিলং এতিয়া মাত্ৰ কেইটামান মূহুৰ্তৰ বাট, এতিয়াই বুক কৰক’।
প্ৰমো হিচাপে আৰম্ভ কৰিবলগীয়া শ্বিলং-ক’লকাতা বিমানসেৱাৰ প্ৰাৰম্ভিক টিকতৰ মূল্য হৈছে মাত্ৰ ২,৮৯৯ টকা।
অলপতে, মেঘালয়ৰ ৰি-ভ’ই জিলাত থকা বিমানবন্দৰটো পৰ্যবেক্ষণ কৰি মেঘালয়ৰ পৰিবহণ মন্ত্ৰী স্নিয়াভালাং ধাৰে জুলাই ২০ তাৰিখৰ পৰা বিমান বন্দৰটোত ইণ্ডিগ’ই বিমান সেৱা আৰম্ভ কৰিব বুলি উল্লেখ কৰিছিল।
ধাৰে উমৰোইৰ পৰা ক’লকাতা হৈ ৰাইপুৰলৈ আন এখন বিমান সেৱা অতিশীৰ্ঘেই আৰম্ভ হ’ব বুলিও উল্লেখ কৰিছিল।
উমৰোই বিমান বন্দৰৰ সম্প্ৰসাৰণ সন্দৰ্ভত সন্দেহ ব্যক্ত কৰি পৰিবহন মন্ত্ৰীগৰাকীয়ে কয় যে ডাঙৰ বিমান সেৱা আৰম্ভ কৰাৰ বাবে বিমান বন্দৰটো সম্প্ৰসাৰণৰ ক্ষেত্ৰত যথেষ্ট ধনৰ প্ৰয়োজন হ’ব বুলি তেওঁ অনুমান কৰিছিল।
বৰ্তমানলৈ উমৰোই বিমান বন্দৰটো সম্পূৰ্ণৰূপে কাৰ্য্যকৰী হৈ উঠা নাই মাত্ৰ সৰু বিমানহে বিমান বন্দৰটোত চলাচল কৰি আছে।
