শ্ৰীভূমিত ৱাকফ সংশোধনী আইনৰ বিৰুদ্ধে তীব্ৰ প্ৰতিবাদ! আৰক্ষীৰ সৈতে সংঘৰ্ষ প্ৰতিবাদকাৰীৰ

ৱাকফ সংশোধনী বিধেয়ক আইনত পৰিণত হোৱাৰ পাছতে প্ৰতিবাদ মুখৰ হৈ পৰিছে বিভিন্ন দল সংগঠন। শেহতীয়া খবৰ আনুসৰি ৱাকফ সংশোধনী আইন শীঘ্ৰে বাতিলৰ দাবীত কৈবাৰ্তা মুছলিম সংগঠনে যোৱা ৭ এপ্ৰিলত নীলামবজাৰত ব্যাপক প্ৰতিবাদী কাৰ্যসূচী গ্ৰহণ কৰে।

এই বিক্ষোভ কাৰ্যসূচীত নীলামবজাৰ চক্ৰ বিষয়া কাৰ্যালয়ৰ চৌহদত সমবেত হৈ শ্লোগান দি শেহতীয়া আইন পৰিৱৰ্তনক লৈ অসন্তুষ্টি প্ৰকাশ কৰে।

প্ৰতিবাদকাৰীয়ে ৰাষ্ট্ৰীয় ঘাইপথ নং ৩ অৱৰোধ কৰাত প্ৰতিবাদস্থলীত উত্তেজনা বৃদ্ধি পায়। আৰু নিৰাপত্তাৰক্ষীৰ সৈতে সংঘৰ্ষত লিপ্ত হয়। পৰিস্থিতি নিয়ন্ত্ৰণ আৰু শৃংখলা বৰ্তাই ৰাখিবলৈ আৰক্ষী আৰু অৰ্ধসামৰিক বাহিনী মোতায়েন কৰা হৈছে।

প্ৰতিবাদ বহুলাংশে শান্তিপূৰ্ণ হৈ থকাৰ বিপৰীতে নিৰাপত্তাৰক্ষীৰ সৈতে সংঘটিত সংঘৰ্ষই অঞ্চলটোৰ যাতায়ত আৰু চলাচল সাময়িকভাৱে ব্যাঘাত জন্মাইছিল। কৰ্তৃপক্ষই নিশ্চিত কৰিছে যে এতিয়া পৰিস্থিতি নিয়ন্ত্ৰণত আছে, আৰু সংঘৰ্ষৰ ফলত কোনো ডাঙৰ আঘাত বা গ্ৰেপ্তাৰৰ খবৰ পোৱা নাই।

এই বিতৰ্কিত সংশোধনী প্ৰত্যাহাৰ নোহোৱা পৰ্যন্ত আন্দোলন অব্যাহত ৰাখিব বুলি কৈবাৰ্তা মুছলিম সংগঠনৰ স্থানীয় নেতাসকলে সদৰী কৰিছে।