অসম আৰক্ষীৰ অপৰাধ শাখাই শুকুৰবাৰে (১৫ ছেপ্টেম্বৰ) গুৱাহাটীত আন্তৰ্জাতিক চাইবাৰ জালিয়াতিৰ চক্ৰ উৎখাত কৰি তিনিজন লোকক গ্ৰেপ্তাৰ কৰে বুলি আৰক্ষীয়ে জানিবলৈ দিয়ে।
গুৱাহাটীৰ একাধিক স্থানত থকা কেইবাটাও কল চেণ্টাৰ আৰু ভুৱা কাষ্টমাৰ চাৰ্ভিচ চেণ্টাৰো আৰক্ষীয়ে ছীল কৰে।
তিনিজন ব্যক্তি- দেৱজ্যোতি দে ওৰফে ডেভিদ (৩১), ৰাজন সিদানা (৩৯), আৰু দিব্যম অৰোৰা (৩১)ক গ্ৰেপ্তাৰ কৰা হৈছে। গুৱাহাটীৰ পৰা পলায়ন কৰিবলৈ সক্ষম হোৱা আন দুজন মাষ্টাৰমাইণ্ডক বৰপেটা জিলাৰ ভবানিপুৰৰ সমীপত গভীৰ নিশা বজালী আৰক্ষীৰ সহায়ত আটক কৰা হয়।
অভিযানৰ সময়ত কল চেণ্টাৰসমূহৰ পৰা ১৪৪ জন পুৰুষ আৰু ৪৭ জন মহিলাকে ধৰি মুঠ ১৯১ জন কৰ্মচাৰীক আটক কৰি ৰখা হয়। তেওঁলোক পঞ্জাৱ, দিল্লী, উত্তৰ প্ৰদেশ, বিহাৰ, পশ্চিম বংগ, অসম, মেঘালয়, মণিপুৰ, নাগালেণ্ড, আৰু ত্ৰিপুৰাৰ।
অভিযানৰ সময়ত ১৬৪টা ডেস্কটপ, ৯০টা লেপটপ, ২৬টা মোবাইল ফোন, আৰু অন্যান্য ইলেক্ট্ৰনিক গেজেট উদ্ধাৰ কৰা হয়।
গুৱাহাটীৰ চাইবাৰ আৰক্ষী থানাত আইপিচিৰ ১২০ (বি)/৪১৯/৪২০/৩৮৫/৪৬৭/৪৬৮/৪৭১/৫০৭ ধাৰাত আৰু তথ্য প্ৰযুক্তি আইন, ২০০০ৰ ৬৫/৬৬/৬৬(বি)/৬৬(চি)/৬৬(ডি) ধাৰাত এটা গোচৰ ৰুজু কৰা হৈছে ।
‘’চোৰাংচোৱাৰ তথ্যৰ ভিত্তিত গুৱাহাটীত কিছুমান কেলেংকাৰী সংঘটিত কৰা চক্ৰ কাৰ্যকৰী হৈ আছে যিয়ে সমগ্ৰ ভাৰতবৰ্ষত কল চেণ্টাৰ চলোৱাৰ লগত জড়িত আৰু ব্যক্তিগত কম্পিউটাৰত আৰু “টেক ছাপৰ্ট”ৰ দ্বাৰা পপ-আপৰ সৃষ্টি কৰি টেক চাপৰ্ট ষ্টাফৰ ৰূপ লৈ সহজ সৰল ভাৰতীয় আৰু বিদেশী নাগৰিকক জালিয়াতি আৰু প্ৰতাৰণাৰ চিকাৰ কৰি লৈছে। বৈধ গ্ৰাহক সেৱাৰ প্ৰতিনিধিৰ ৰূপ লৈ ব্যক্তিক প্ৰতাৰণা কৰি তেওঁলোকৰ ধন বা ব্যক্তিগত তথ্যৰ পৰা প্ৰতাৰণা কৰি বিভিন্ন ভুৱা দাবীৰে বেংক একাউণ্টৰ ধন সৰকোৱা হৈছে, কম্পিউটাৰত ভাইৰাছ আছে, ব্যক্তিগত চিনাক্তকৰণযোগ্য তথ্য বিপদত পৰা বুলি ভয় বা আশংকা সৃষ্টি কৰা হৈছে বা কম্পিউটাৰ বা ছ’চিয়েল মিডিয়া একাউণ্ট হেক কৰা হৈছে।’- এই মন্তব্য গুৱাহাটীৰ আৰক্ষী আয়ুক্ত দিগন্ত বৰাৰ।
বৰাই কয় যে এই চক্ৰটোৱে সহজ সৰল ভুক্তভোগীৰ পৰা লাখ লাখ টকা প্ৰৱঞ্চনা কৰা বুলি ধাৰণা কৰা হৈছে। তেওঁলোকে নিজকে কোনো সুপৰিচিত কোম্পানী বা সংস্থাৰ বুলি দাবী কৰি অনাকাংক্ষিত ফোন কলৰ জৰিয়তে যোগাযোগ আৰম্ভ কৰিব আৰু তাৰ পিছত ভুক্তভোগীসকলক ঠগাই ৰিম’ট ডেস্কটপ চফটৱেৰ ইনষ্টল কৰিব বা তেওঁলোকৰ ব্যক্তিগত তথ্য নিয়ে বুলিও তেওঁ কয়।
ইয়াৰ পিছত চক্ৰটোৱে এই তথ্য ব্যৱহাৰ কৰি ভুক্তভোগীৰ বেংক একাউণ্টৰ পৰা ধন চুৰি কৰিব বা ডাৰ্ক ৱেবত তেওঁলোকৰ ব্যক্তিগত তথ্য বিক্ৰী কৰিব পাৰে বুলিও বৰাই লগতে কয়।
আৰক্ষীয়ে বিষয়টো অধিক তদন্ত কৰি পলায়ন কৰা মাষ্টাৰমাইণ্ডক বিচাৰি উলিয়াবলৈ চেষ্টা চলাইছে। লগতে এনে কেলেংকাৰিৰ বিৰুদ্ধে সজাগ হৈ থাকিবলৈ আৰু ফোনযোগে কোনো ব্যক্তিগত তথ্য নিদিবলৈ আহ্বান জনাইছে।
