আজিৰে পৰা গুৱাহাটীৰ নেহৰু ষ্টেডিয়ামৰ দেশভক্ত তৰুণৰাম ফুকন ইনড’ৰ ষ্টেডিয়ামত আৰম্ভ হৈছে প্ৰথম গুৱাহাটী আন্ত:ৰাষ্ট্ৰীয় মুকলি গ্ৰাণ্ডমাষ্টাৰ দবা প্ৰতিযোগিতা।
সদৌ অসম দবা সন্থাৰ উদ্যোগত অনুষ্ঠিত হোৱা এই আন্ত:ৰাষ্ট্ৰীয় দবা প্ৰতিযোগিতা খনত ১১ দেশৰ ২৭ গৰাকী শীৰ্ষ দবাৰুসহ মুঠ ২৫৫ গৰাকী প্ৰতিযোগীয়ে অংশ গ্ৰহণ কৰিছে।
প্ৰতিযোগিতা খন আবেলি আনুষ্ঠানিকভাৱে উদ্বোধন কৰে অসম চৰকাৰৰ ক্ৰীড়া আৰু যুৱ কল্যাণ মন্ত্ৰী বিমল বৰাই।
মন্ত্ৰী বৰাই আন্ত:ৰাষ্ট্ৰীয় দবা প্ৰতিযোগিতা খন উদ্বোধন কৰি কয় যে পোন প্ৰথম বাৰৰ বাবে গুৱাহাটীত আয়োজন কৰা এই দবা প্ৰতিযোগিতাত অংশ গ্ৰহণ কৰা ন-দবাৰু সকলৰ বাবে প্ৰচুৰ সম্ভাৱনা কঢ়িয়াই আনিব।
ইয়াৰ উপৰি মন্ত্ৰীজনে গ্ৰেণ্ডমাষ্টাৰচ সকলক উষ্ম আদৰণি জনাই ভাষণ প্ৰদান কৰে।প্ৰতিযোগিতা খন আৰম্ভ হোৱাৰ পূৰ্বে গ্ৰেণ্ডমাষ্টাৰ,আই এম আদিকে ধৰি দেশী, বিদেশী শীৰ্ষ দবাৰু সকলক আয়োজক সমিতিৰ তৰফৰ পৰা আদৰণি জনোৱা হয়।
গুৱাহাটী আন্ত:ৰাষ্ট্ৰীয় দবা প্ৰতিযোগিতা খনত অংশ গ্ৰহণ কৰা বিদেশী ৰাষ্ট্ৰ কেইখন হ’ল- ছেছ ফেডাৰেশ্যন অফ ৰাছিয়া, পাৰাগুৱে, আজেৰবাইজান, ইজিপ্ত, ইৰাণ, মালদ্বীপ, নেপাল, জাম্বিয়া, কলম্বিয়া, উজবেকিস্তান আৰু আৰমেনিয়া।
উল্লেখ্য যে ১৪ মাৰ্চৰ পৰা ২০ মাৰ্চলৈ অনুষ্ঠিত হ’ব লগা প্ৰতিযোগিতা খন ছুইচ লীগ পদ্ধতিৰে মুঠ ১০ টা ৰাউণ্ডত খেলোৱা হ’ব।
