ইৰাণে আৰ দুজন প্ৰতিবাদকাৰী মহম্মদ মেহেদী কাৰামি আৰু চৈয়দ মহম্মদ হুছেইনীক মৃত্যুদণ্ড দিছে। তেওঁলোকক শনিবাৰে ৰাতিপুৱা মৃত্যুদণ্ড দিয়া হয়।
কাৰামি আৰু হুছেইনীৰ বিৰুদ্ধে যোৱা বছৰ ৰাষ্ট্ৰ বিৰোধী প্ৰতিবাদ কৰাৰ অভিযোগ উত্থাপিত হৈছিল। তেওঁলোকক ইৰাণৰ অৰ্ধসামৰিক বাহিনীৰ এজন সদস্য চৈয়দ ৰুহোল্লাহ আজমিয়ানক হত্যা কৰাৰ বাবে দোষী সাব্যস্ত কৰা হৈছে। ৰুহোল্লাহ আজামিয়ানক যোৱা বছৰৰ ৩ নৱেম্বৰত কাৰাজ চহৰত হত্যা কৰা হৈছিল।
আৰক্ষীৰ জিম্মাত থকা এগৰাকী কুৰ্দি ছোৱালী মাছা আমিনীৰ মৃত্যুক লৈ ১৬ ছেপ্টেম্বৰত সমগ্ৰ ইৰাণত প্ৰতিবাদ আৰম্ভ হৈছিল। ইৰাণৰ নিৰাপত্তা বাহিনীৰ ডজন সংখ্যক সদস্যকে ধৰি সহস্ৰাধিক প্ৰতিবাদকাৰী নিহত হয়।
লগতে পঢ়ক: ৰাষ্ট্ৰপতিৰ প্ৰস্ৰাৱ কৰা ভিডিঅ’ লোৱাৰ বাবে গ্ৰেপ্তাৰ ৬ সাংবাদিক
কাৰামিৰ অধিবক্তা মহম্মদ হোচেই আগাছিয়ে শনিবাৰে টুইটাৰত কয় যে তেওঁ তেওঁৰ মৃত্যুদণ্ড কাৰ্যকৰী কৰাৰ আগতে তেওঁৰ পৰিয়ালৰ সৈতে কথা পাতিব বিচাৰিছিল। কিন্তু তেওঁক অনুমতি দিয়া হোৱা নাছিল। তদুপৰি, কাৰামিয়ে বুধবাৰৰ পৰা আমৰণ অনশনত আছিল কিয়নো তেওঁক গোচৰটোৰ বিৰুদ্ধে যুঁজিবলৈ উকীল নিযুক্ত কৰাৰ অনুমতি দিয়া হোৱা নাছিল।
কাৰামিৰ বয়স ২১ বছৰ। তেওঁ এজন চেম্পিয়ন কাৰাটে খেলুৱৈ আছিল। যোৱা ডিচেম্বৰত তেওঁৰ মৃত্যুদণ্ডৰ ৰায়ৰ পিছত তেওঁৰ পিতৃ-মাতৃয়ে তেওঁলোকৰ পুত্ৰৰ জীৱন ভিক্ষা বিচাৰি ছচিয়েল মিডিয়াৰ সহায় লৈছিল। কাৰামিৰ পিতৃয়ে কৈছিল, “অনুগ্ৰহ কৰি মোৰ পুত্ৰক মৃত্যুদণ্ড দিয়াৰ আদেশটো উঠাই লওক।‘’
আনহাতে, চৈয়দ মহম্মদ হুছেইনী এজন শিশুসকলৰ স্বেচ্ছাসেৱী প্ৰশিক্ষক আছিল। তেওঁ পিতৃ-মাতৃকো হেৰুৱাইছে। প্ৰতি বৃহস্পতিবাৰে তেওঁ পিতৃ-মাতৃৰ কবৰস্থানলৈ গৈছিল। তেওঁ শিশুসকলক বিনামূলীয়াকৈ প্ৰশিক্ষণ দিছিল। তেওঁক তেওঁৰ পিতৃ-মাতৃৰ কবৰস্থানলৈ যাওঁতে গ্ৰেপ্তাৰ কৰা হৈছিল।
লগতে পঢ়ক: আন্তৰ্জাতিক সংবাদ মাধ্যমৰ দাবী; হেকাৰৰ কবলত টুইটাৰ, ২৩ কোটি একাউণ্টৰ তথ্য ফাদিল!
ইৰাণ চৰকাৰৰ মতে, ৪১ জন প্ৰতিবাদকাৰীক মৃত্যুদণ্ড দিয়া হৈছে। অৱশ্যে, নৰৱেস্থিত মানৱ অধিকাৰ সংগঠন ইৰাণ হিউমেন ৰাইটছ (আইএইচআৰ)ৰ মতে, ইৰাণত চলি থকা প্ৰতিবাদৰ সৈতে জড়িত অপৰাধৰ বাবে কমেও ১০০ জন লোকক মৃত্যুদণ্ড দিয়া হৈছে বা মৃত্যুদণ্ড যোগ্য অপৰাধৰ অভিযোগ অনা হৈছে।
