দিন ভালে যোৱা নাই বিদায়ী মাৰ্কিন ৰাষ্ট্ৰপতি ড’নাল্ড ট্ৰাম্পৰ।
সমৰ্থকক উচতাই মাৰ্কিন যুক্তৰাষ্ট্ৰৰ ৰাজধানী ৱাশ্বিংটন ডিচিত হিংসা বিয়পোৱাৰ বাবে বিশ্ব সম্প্ৰদায়ৰ ককৰ্থনা খোৱা ট্ৰাম্পৰ বিৰুদ্ধে ইৰাণে জাৰি কৰিছে গ্ৰেপ্তাৰি পৰোৱানা।
ইৰাণৰ শীৰ্ষ সেনা বিষয়া কাছেম ছোলেইমানিক হত্যা কৰাৰ গোচৰত মাৰ্কিন যুক্তৰাষ্ট্ৰৰ বিদায়ী ৰাষ্ট্ৰপতি ড’নাল্ডসহ ৪৮ গৰাকী লোকৰ বিৰুদ্ধে গ্ৰেপ্তাৰী পৰোৱানা জাৰি কৰিছে ইৰাণে।
ইৰাণৰ বিচাৰ বিভাগৰ মুখপাত্ৰ গোলাম হুছেইন ইছলামিয়ে এক সংবাদ মেলত ট্ৰাম্পসহ ৪৮ গৰাকী লোকৰ বিৰুদ্ধে ইৰাণে গ্ৰেপ্তাৰী পৰোৱানা জাৰি কৰাৰ কথা ঘোষণা কৰে।
ইৰাণে কাছেমিৰ হত্যাৰ অভিযোগত অভিযুক্ত ড’নাল্ড ট্ৰাম্পক গ্ৰেপ্তাৰ কৰিবলৈ ইন্টাৰপ’লক সহায় কৰিবলৈও অনুৰোধ জনাইছে।
ইৰাণৰ চৰকাৰী সংবাদ সংস্থা IRNAৰ মতে ২০২০ বৰ্ষৰ ৩ জানুৱাৰীত বাগদাদৰ বিমান বন্দৰত ড্ৰোণ আক্ৰমণত নিহত হৈছিল কাছেম ছোলেইমানি।
উল্লেখ্য যে যোৱা জুন মাহতো ছোলেইমানিৰ হত্যাত জড়িত থকাৰ অভিযোগত ড’নাল্ড ট্ৰাম্পক তেহৰাণে গ্ৰেপ্তাৰ কৰিবলৈ ইন্টাৰপ’লৰ সহায় বিচাৰিছিল। কিন্তু ইন্টাৰপ’লে তেহৰাণৰ এই আবেদন খাৰিজ কৰিছিল।
