প্ৰত্যাক্ৰমণৰ আশংকা সত্য হ’ল । শনিবাৰে পুৱতি নিশা ইৰাণৰ ক্ষেপণাস্ত্ৰ আক্ৰমণত কঁপি উঠিল টেল আভিভ! নিশাৰ আকাশৰ পৰা এটা মাৰাত্মক অগ্নিগোলক নামি অহা দেখা গ’ল। কেৱল ইজৰাইলৰ ৰাজধানীতে নহয়, জেৰুজালেমতো বিস্ফোৰণৰ শব্দ শুনা গ’ল। তীব্ৰ ছাইৰেনৰ শব্দ বাজি থকা শুনা গ’ল।
শুকুৰবাৰে ইৰাণত আক্ৰমণ চলাইছিল ইজৰাইলে। সেই সময়ৰ পৰাই প্ৰত্যাক্ৰমণৰ আশংকা আছিল। অৱশেষত ইৰাণে ৬৫ মিনিটত ২০০ টা বেলিষ্টিক মিছাইল নিক্ষেপ কৰে। এই দাবী সংবাদ মাধ্যমৰ। ইয়াৰ পিছত ইজৰাইলে পুনৰ আক্ৰমণ চলাইছে দেশখনত।
ইৰাণে টেল আভিভত এই অভিযানক ‘অপাৰেচন ট্ৰু প্ৰমিজ ৩’ বুলি নামকৰণ কৰিছে। তেহৰানে দাবী কৰিছে যে তেওঁলোকৰ মূল লক্ষ্য হৈছে ইজৰাইলৰ সামৰিক ঘাটি। এই পৰ্যন্ত অভিযানত ১ জন লোকৰ মৃত্যু হোৱা বুলি জানিব পৰা গৈছে। ৩৪ জন আহত হৈছে।
ইপিনে শুকুৰবাৰে ইৰাণৰ ৩৩০ৰো অধিক স্থানত ইজৰাইলে ‘অপাৰেচন ৰাইজিং ছান’ চলাইছিল। শনিবাৰে পুনৰ ইৰাণৰ বিৰুদ্ধে প্ৰত্যাক্ৰমণ চলায়। মুঠতে ইজৰাইলৰ আক্ৰমণত কমেও ৭৮ জন লোক নিহত হয়। আহত হৈছে কমেও ৩২০ জন লোক।
এই বিমান আক্ৰমণত ইৰাণৰ সামৰিক ঘাটি আৰু পাৰমাণৱিক অস্ত্ৰৰ কেন্দ্ৰসমূহ লক্ষ্য কৰি লোৱা হয়। ফলত ইৰাণৰ সেনাৰ মুৰব্বী মহম্মদ বাঘেৰী, ৰিভল্যুচনেৰী গাৰ্ড কমাণ্ডাৰ হোছেইন চালামি, ইৰাণৰ ইমাৰ্জেন্সি কমাণ্ড কমাণ্ডাৰ নিহত হয়। ইৰাণৰ প্ৰাক্তন ৰাষ্ট্ৰীয় নিৰাপত্তা উপদেষ্টা আলী ছামখানীয়েও প্ৰাণ হেৰুৱাইছে। ইৰাণেও কয় যে কমেও ৬ জন পাৰমাণৱিক বিজ্ঞানী নিহত হৈছে। ইজৰাইলৰ এই আক্ৰমণত বহু সামৰিক জোৱান আৰু বিষয়াও নিহত হয়।
ইৰাণ আৰু ইৰাকে নিজৰ আকাশমাৰ্গ সম্পূৰ্ণৰূপে বন্ধ কৰি দিয়াৰ বাবে সমগ্ৰ মধ্যপ্ৰাচ্যৰ বিমান পৰিবহণ কাৰ্যতঃ স্তব্ধ হৈ পৰিছে। কেইবাটাও বিমান সংস্থাই স্থগিত ৰাখিছে বিমান সেৱা। এনে পৰিস্থিতিত শনিবাৰে ইৰাণ আৰু ইজৰাইলৰ ইখনে সিখনৰ ওপৰত পুনৰ চলোৱা আক্ৰমণৰ ফলত মধ্যপ্ৰাচ্যত যুদ্ধৰ মেঘ আৰু অধিক ঘণীভূত হৈ পৰিছে।
