ইৰাণৰ সাহিত্য জগতত গভীৰ শোকৰ ছাঁ নামি আহিছে। ইজৰাইলৰ বিমান আক্ৰমণত নিহত হৈছে ২৩ বছৰীয়া যুৱ কবি পাৰ্নিয়া আব্বাছি।
এই আক্ৰমণত তেওঁৰ পিতৃ, মাতৃ আৰু ১৫ বছৰীয়া ভাতৃ পৰহামকে ধৰি পৰিয়ালৰ সকলো সদস্য নিহত হয়। তেহৰাণৰ সত্তাখান ষ্ট্ৰীটৰ অৰ্কিড কমপ্লেক্সত সংঘটিত হৈছে এই ঘটনা। আক্ৰমণৰ মাত্ৰ কেইদিনমান পিছতেই পাৰ্নিয়াৰ জন্মদিন আছিল।
ইংৰাজী অনুবাদত স্নাতক পাৰ্নিয়া বেংক মেল্লিৰ কৰ্মচাৰী আৰু ইংৰাজী শিক্ষয়ত্ৰী আছিল। শেহতীয়াকৈ তেওঁ মেনেজমেণ্টত স্নাতকোত্তৰ ডিগ্ৰীত নামভৰ্তি কৰিছিল যদিও কামৰ বাবে স্থগিত ৰাখিছিল। ইৰাণৰ শীৰ্ষস্থানীয় সাহিত্য আলোচনীসমূহত তেওঁৰ কবিতা ‘ছাইলেণ্ট ষ্টাৰ’কে ধৰি তেওঁৰ বহু লেখা প্ৰকাশ পাইছে।
বান্ধৱী মৰিয়ামে কৈছিল যে তেওঁ সেইদিনা ৰাতিপুৱা পাৰ্নিয়াক লগ পোৱাৰ কথা আছিল। কিন্তু গৈ পোৱাৰ লগে লগে দেখিলে যে ধ্বংসাৱশেষৰ পৰা উদ্ধাৰ হৈছে প্ৰিয় কবি আৰু ভায়েকৰ নিৰ্জীৱ দেহ।
ইজৰাইলৰ এই আক্ৰমণত বহু নিৰীহ সাধাৰণ নাগৰিকৰ মৃত্যুৰ ঘটনাই আন্তঃৰাষ্ট্ৰীয় পৰ্যায়ত গৰিহণা লাভ কৰিছে। বহুতে আমেৰিকা সমৰ্থিত এই আক্ৰমণক আন্তঃৰাষ্ট্ৰীয় আইন উলংঘা বুলি অভিহিত কৰিছে।
পাৰ্নিয়া আৰু তেওঁৰ ভাতৃৰ মৃত্যুক এতিয়া ইৰাণত যুদ্ধবিধ্বস্ত সাধাৰণ নাগৰিকৰ দুৰ্দশাৰ প্ৰতীক হিচাপে দেখা গৈছে।
