ভাৰতৰ গগনযান অভিযান কেতিয়া হ’ব সেই বিষয়ে জানিবলৈ বহুতে আগ্ৰহী। সূত্ৰ অনুসৰি ২০২৬ চনৰ শেষৰ ফালে ভাৰতৰ গগনযান অভিযান হ’ব। অৱশ্যে অহা বছৰৰ আৰম্ভণিতে এই ৰকেটৰ এটা পৰীক্ষামূলক আখৰা হ’ব পাৰে। ইছৰোৰ অধ্যক্ষ এছ সোমনাথে এইদৰে জনাইছে।
গগনযান অভিযান ভাৰতৰ প্ৰথম হিউমেন স্পেচ ফ্লাইট। অৰ্থাৎ এই ৰকেটটোত উঠি মানুহ মহাকাশলৈ যাব। এই ৰকেটটো পৃথিৱীৰ পৃষ্ঠৰ পৰা ৪০০ কিলোমিটাৰ দূৰত্বত যাব। তিনিদিনীয়া মিছন। ইয়াৰ পিছত ই নিৰাপদে ভাৰত মহাসাগৰলৈ উভতি আহিব।
এই অভিযানৰ খৰচ হ’ব পাৰে প্ৰায় ৯০ বিলিয়ন। যদি এই অভিযান সফল হয় তেন্তে মহাকাশলৈ মানুহ পঠোৱা বিশ্বৰ চতুৰ্থখন দেশ হ’ব ভাৰত। ইয়াৰ আগতে ছোভিয়েট ইউনিয়ন, আমেৰিকা আৰু চীনে মহাকাশলৈ মানুহ প্ৰেৰণ কৰিছিল।
আই আই টি গুৱাহাটীত এটা অনুষ্ঠানত অংশগ্ৰহণ কৰিবলৈ আহি তেওঁ কয়, আমি যোৱা চাৰি বছৰ ধৰি এই গগনযান প্ৰকল্পটোৰ কাম কৰি আহিছো। আমাৰ ৰকেটটো প্ৰায় সাজু হৈছে। কিন্তু অহা বছৰৰ আৰম্ভণিতে হ’ব প্ৰথমটো মানৱবিহীন ৰকেট অনুশীলন। এই ৰকেটৰ পৰীক্ষা চলিত বৰ্ষৰ ডিচেম্বৰৰ আশে-পাশে হোৱাৰ কথা আছিল। কিন্তু কিছুমান কাৰিকৰী কাৰণত শেষত কৰিব পৰা নগ’ল।
তেওঁ কয় যে ২০২৬ চনৰ শেষৰ ফালে আৰু তিনিটা ৰকেট নিক্ষেপ কৰা হ’ব। আমি প্ৰথম উৎক্ষেপণৰ সময়ত ৰকেটৰ ভিতৰত এটা ৰবট ৰাখিম। তাৰ নাম ব্যোমমিত্ৰ। ইয়াৰ উপৰিও আৰু দুটা ৰকেট নিক্ষেপ কৰা হ’ব। তিনিটা ৰকেট সফল হোৱাৰ পিছত তেতিয়া মানুহ থকা ৰকেটটো উৎক্ষেপণ কৰা হ’ব। মহাকাশচাৰী সকলো সাজু। আমাৰ লক্ষ্য ২০২৬ চনৰ শেষৰ ফালে এই মহাকাশযানখন উৎক্ষেপণ কৰা।
ইয়াৰ পূৰ্বে এছ সোমনাথে কৈছিল যে ভাৰতীয় মহাকাশচাৰী আই এছ এছত উপস্থিত হোৱাৰ পিছত তাৰ অভিযান কেৱল পৰীক্ষা-নিৰীক্ষাতে সীমাবদ্ধ নহয় বৰঞ্চ নতুন কথা শিকাৰ সম্পূৰ্ণ দায়িত্বও থাকে। লগতে তেওঁ কয়, আই এছ এছত গগণযাত্ৰীৰ উৰণে ভাৰতে নিজৰ গগনযানৰ বাবে কেনেদৰে প্ৰস্তুতি চলাব লাগে সেই কথা বুজিবলৈ সহায় কৰিব।
ইছৰোৱে লগতে কৈছে যে মহাকাশচাৰীসকলে মহাকাশত উৰণৰ অভিজ্ঞতা লাভ কৰিলে আমি জানিব পাৰিম যে তেওঁলোকে এই অভিযান কেনেকৈ পৰিচালনা কৰিব আৰু মহাকাশযানখনে আই এছ এছৰ সৈতে কেনেকৈ সংযুক্ত হ’ব। ইতিমধ্যে তাত নিয়োজিত আন্তঃৰাষ্ট্ৰীয় ক্ৰুৰ সৈতে কাম কৰিলে আমাক কিছুমান মূল্যৱান কথা শিকাব। এই অভিযানৰ মুখ্য মহাকাশচাৰীকো এই অভিযান চলাবলৈ প্ৰশিক্ষণ দিয়া হ’ব।
