ভাৰতীয় মহাকাশৰ আন এক বৃহৎ সাফল্য। ইছৰৰ বিক্ৰম সাৰাভাই মহাকাশ কেন্দ্ৰ (ভিএছএছচি) আৰু চেমিকণ্ডাক্টৰ লেবৰেটৰী (এছচিএল), চণ্ডীগড়ে মহাকাশ অভিযানত ব্যৱহাৰৰ বাবে ভাৰতৰ প্ৰথম স্বদেশী ৩২-বিট মাইক্ৰপ্ৰচেছৰ ‘বিক্ৰম ৩২০১’ আৰু ‘কল্পনা ৩২০১’ যৌথভাবে বিকশিত কৰিছে।
মহাকাশ সংস্থাটোৱে প্ৰকাশ কৰা তথ্য অনুসৰি বিক্ৰম ৩২০১ হৈছে প্ৰথমটো ভাৰতত নিৰ্মিত ৩২-বিট প্ৰচেছৰ যিয়ে লঞ্চ বাহনৰ কঠোৰ পৰিস্থিতিত ব্যৱহাৰৰ বাবে যোগ্যতা অৰ্জন কৰিছে, আনহাতে কল্পনা ৩২০১ SPARC V8 আৰ্কিটেকচাৰৰ ওপৰত ভিত্তি কৰি নিৰ্মাণ কৰা হৈছে আৰু মুক্ত উৎসৰ চফ্টৱেৰ সঁজুলিৰ সৈতে সামঞ্জস্যৰ বাবে ডিজাইন কৰা হৈছে।
দুয়োটা প্ৰচেছৰ পূৰ্বৰ ইছৰোৰ মাইক্ৰ’প্ৰচেছৰৰ উন্নত সংস্কৰণ আৰু ফ্লটিং-পইণ্ট গণনা আৰু এডিএ(Ada) প্ৰগ্ৰেমিং ভাষা সমৰ্থন কৰে। এই মাইক্ৰ’প্ৰচেছৰসমূহৰ বিকাশে ভাৰতৰ বাবে উৎক্ষেপণ বাহনৰ নেভিগেচন, গাইডেন্স আৰু নিয়ন্ত্ৰণৰ বাবে নিৰ্ভৰযোগ্য অনব’ৰ্ড কম্পিউটাৰ সৃষ্টিৰ ক্ষেত্ৰত এক উল্লেখযোগ্য কৃতিত্ব হিচাপে পৰইগণিত হৈছে।
উল্লেখ্য যে পিএছএলভি-চি৬০ অভিযানৰ সময়ত বিক্ৰম ৩২০১ৰ প্ৰাৰম্ভিক গোটটো মহাকাশত সফলতাৰে পৰীক্ষা কৰা হৈছিল আৰু দুয়োটাৰে প্ৰথম উৎপাদন বেচ শেহতীয়াকৈ মহাকাশ বিভাগৰ সচিব তথা ইছৰোৰ অধ্যক্ষ ভি নাৰায়ণনক ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ৰ সচিব এছ কৃষ্ণনে (MeitY) অৰ্পণ কৰে।
ইয়াৰ উপৰিও উৎক্ষেপণ বাহন ব্যৱস্থা উন্নত কৰাৰ বাবে ক্ষুদ্ৰ এভিয়নিকছৰ সঁজুলিও প্ৰদান কৰা হৈছে। বতাহৰ সুৰংগ প্ৰয়োগৰ বাবে ক্ষুদ্ৰ চাপ চেন্সৰ বিকাশৰ বাবেও ইছৰোৱে এছচিএলৰ সৈতে বুজাবুজি চুক্তি স্বাক্ষৰ কৰিছে।
