প্ৰখ্যাত উদ্যোগপতি ইলন মাস্কৰ মাতৃ মায়ে মাস্কৰ সৈতে একেলগে দেখা গ’ল বলিউডৰ মোহময়ী অভিনেত্ৰী জেকলিন ফাৰ্নাণ্ডেজক।
দেওবাৰটো মুম্বাইৰ সিদ্ধিবিনায়ক মন্দিৰত ইলন মাস্কৰ মাতৃ মায়ে মাস্কৰ সৈতে পূজা কৰা দেখা গ’ল অভিনেত্ৰীগৰাকীক। ইতিমধ্যে সামাজিক মাধ্যমত ভাইৰেল হৈ পৰিছে মন্দিৰত পূজা কৰি থকা ছবিখন। ছবিখনে এতিয়া তোলপাৰ লগাইছে সামাজিক মাধ্যমত।
ছবিখনত মায়ে মাক্স আৰু জেকলিন ফাৰ্নাণ্ডেজে হালধীয়া বস্ত্ৰ পিন্ধি ওৰণি লৈ পুৰোহিতৰ আশীৰ্বাদ গ্ৰহণ কৰি থকা দেখা পোৱা গৈছে।
উল্লেখ্য যে ইলন মাস্কৰ মাতৃ মায়ে মাস্ক বৰ্তমান ভাৰতত আছে। মায়ে মাস্কে ৰচনা কৰা ‘এ উইমেন মেকছ এ প্লেন’ ৰ হিন্দী সংস্কৰণ উন্মোচনৰ বাবে ভাৰতলৈ আহিছে তেওঁ।
এই বিষয়ে সোধাত জেকলিনে কয়, “মোৰ প্ৰিয় বন্ধু মায়েৰ সৈতে মন্দিৰত আশীৰ্বাদ বিচৰাটো মোৰ বাবে এক সুন্দৰ অভিজ্ঞতা আছিল। তেওঁৰ গ্ৰন্থ উন্মোচনৰ বাবে ভাৰতত আছেহি। মায়েৰ কিতাপখন এগৰাকী মহিলাৰ স্থিতিস্থাপকতাৰ প্ৰতীক। এই গ্ৰন্থখনে মোক বহু কথা শিকাইছে। বিশেষকৈ বয়স যে মাত্ৰ এটা সংখ্যা আৰু বয়সৰ দ্বাৰা আপোনাৰ সপোন আৰু লক্ষ্যক সংজ্ঞায়িত কৰা উচিত নহয়।”
উল্লেখ্য যে মাতৃৰ মৃত্যুৰ পিছত জেকলিনৰ প্ৰথম ৰাজহুৱা ভ্ৰমণৰ ভিতৰত এইটো আছিল অন্যতম। যোৱা ২৪ মাৰ্চত ষ্ট্ৰোকৰ ফলত মাতৃ কিম ফাৰ্নাণ্ডেজক আই চি ইউত ভৰ্তি কৰোৱা হৈছিল। ৬ এপ্ৰিলত তেওঁৰ মৃত্যু হয়। বাহৰেইনৰ মানামাত বাস কৰা কিমে ইয়াৰ পূৰ্বে ২০২২ চনত একেধৰণৰ স্বাস্থ্য সংকটৰ সন্মুখীন হৈছিল আৰু তেতিয়াও বাহৰেইনত চিকিৎসালয়ত ভৰ্তি হৈছিল।
উল্লেখ্য যে মুম্বাইত মায়ে মাস্কৰ ৭৭ সংখ্যক জন্মদিন উদযাপন কৰা হয়। ৪০-৫০ জন লোকৰ উপস্থিতিত ব্যক্তিগত পাৰ্টি আয়োজন কৰিছিল মায়েই।শেহতীয়াকৈ ফাতেহত দেখা গৈছিল জেকলিন ফাৰ্নাণ্ডেজক। অনাগত দিনত মুক্তি পাবলগা ছবি ৱেলকাম টু দ্য জংগল আৰু হাউছফুল ৫ ছবিতো দেখা যাব অভিনেতাগৰাকীক।
