জাগুনত চুৰি মাৰুটি ভান উদ্ধাৰ; আটক দুই গাড়ী চোৰ
তিনিচুকীয়া জিলাৰ মাৰ্ঘেৰিটা মহকুমাৰ অন্তৰ্গত জাগুন আৰক্ষীয়ে জাগুন-অৰুণাচল সীমান্তৱৰ্তী দিহিং নদী ঘাটৰ পাৰৰ পৰা এখন চুৰি মাৰুটি ভান উদ্ধাৰ কৰাৰ লগতে দুজন চোৰক আটক কৰে।
উল্লেখযোগ্য যে কিছুদিনৰ পৰা মাৰ্ঘেৰিটাত গাড়ী চোৰৰ সন্ত্ৰাস বৃদ্ধি পাই অহাৰ সময়তে যোৱা দেওবাৰে নিশা নাহৰকটিয়া জয়পুৰ তাঁতিপথাৰ নিৱাসী প্ৰদূন্য দেব নামৰ ব্যক্তিজনৰ ঘৰৰ পৰা চোৰে মাৰুটি ভানখন চুৰি কৰি নিছিল।
গাড়ীখন বিচাৰি নোপোৱাত প্ৰদূন্য দেবে গাড়ীখন স্থানীয় আৰক্ষী থানাত গাড়ীখন হেৰুৱা বুলি এখন এজাহাৰ দাখিল কৰাৰ পিছত জাগুন থানাৰ আৰক্ষীৰ এটা দলে আজি মাৰুটি ভানসহ ৰঞ্জিত গগৈ (২৬) আৰু গোবিন্দ গগৈ (২৮) নামৰ গাড়ী চোৰ দুজনক আটক কৰিবলৈ সক্ষম হয়। গাড়ীখন উদ্ধাৰ কৰাৰ অৱস্থাত ইয়াৰ নম্বৰ প্লেটখন এৰখাই থকাৰ লগতে গ্লাছ কেইখনো ভঙা অৱস্থাত আছিল।
আনহাতে, ধৃত দুই চোৰৰ ঘৰ ক্ৰমে ডিব্ৰুগড় জিলাৰ ভাদৈ পাঁচআলি আৰু নাহৰকটীয়া জয়পুৰৰ বাঘমৰাত বুলি আৰক্ষীৰ সূত্ৰই জানিবলৈ দিয়ে। পিছত জাগুন আৰক্ষীয়ে চোৰদুজনক জাগুন চৰকাৰী চিকিৎসালয়ত স্বাস্থ্য পৰীক্ষা কৰোৱাই ডিব্ৰুগড় জিলাৰ অন্তৰ্গত জয়পুৰ আৰক্ষীক গতাই দিয়ে।