‘হিন্দু বাঙালী সমাবেশ’ৰ নাম সলনি কৰি মৈত্ৰী সন্মিলন অনুষ্ঠিত কৰিবলৈ চাতুৰী চলোৱাৰ সময়তে নাগৰিক অধিকাৰ সুৰক্ষা মঞ্চ, অসম চমুকৈ চিআৰপিএফক কোনোধৰণৰ অনুষ্ঠান পাতিবলৈ নিদিয়ে জাতীয়তাবাদ পুনৰ নিৰ্মাণ সমিতিয়ে।
উল্লেখযোগ্য যে, অহা ১৭ নৱেম্বৰত ‘নাগৰিকত্ব সংশোধনী বিধেয়ক, ২০১৬’-ৰ সমৰ্থনত গুৱাহাটীত সমাৱেশ পতাৰ সিদ্ধান্ত লোৱাৰ পাছত অসমৰ খিলঞ্জীয়া ৰাইজ আৰু জাতীয় দল-সংগঠনৰ মাজত সৃষ্টি হৈছিল তীব্ৰ প্ৰতিক্ৰিয়া। তাৰ পাছতেই সুৰ সলনি কৰি ‘মৈত্ৰী সন্মিলন’ অনুষ্ঠিত কৰিব বিচৰা বুলি সংবাদমেলযোগে ঘোষণা কৰিছিল ‘নাগৰিক অধিকাৰ সুৰক্ষা মঞ্চ’ই।
আনহাতে, এনেধৰণৰ ‘মৈত্ৰী সন্মিলনো’ অনুষ্ঠিত কৰিলে বুকু পাতি বাধা দিয়াৰ হুংকাৰ দিছে জাতীয়তাবাদ পুনৰ নিৰ্মাণ সমিতিৰ সাধাৰণ সম্পাদক ৰাজকুমাৰ বৈশ্যই। আজি এই সন্দৰ্ভত জাতীয়তাবাদ পুনৰ নিৰ্মাণ সমিতিৰ এক কাৰ্য্য নিৰ্বাহক বৈঠক অনুষ্ঠিত হৈছিল।
বৈঠকৰ অন্তত এই সম্পৰ্কত নৰ্থ ইষ্ট নাওৰ সৈতে হোৱা কথা-বতৰাত তেওঁ কয় ‘তেওঁলোকে ১৭ নবেম্বৰৰ দিনটোত যিয়েই নাপাতক আমি বাধা দিমেই।‘
আনহাতে, নাগৰিকত্ব সংশোধনী বিধেয়কখন সন্দৰ্ভত নাগৰিক অধিকাৰ সুৰক্ষা মঞ্চখনে সদৌ অসম ছাত্ৰ সন্থা, জাতীয়তাবাদী যুৱ ছাত্ৰ পৰিষদকে ধৰি বিভিন্ন জাতীয় দল সংগঠনৰ লগতে আলোচনা বিচাৰিছিল। কিন্তু এই ক্ষেত্ৰত কোনোধৰণৰ আলোচনা নিবিচাৰে জাতীয়তাবাদ পুনৰ নিৰ্মাণ সমিতি, অসমে।
এইক্ষেত্ৰত সমিতিৰ সাধাৰণ সম্পাদকগৰাকীয়ে কয় ‘আমাৰ স্পষ্ট কথা, আমি তেওঁলোকৰ সৈতে আলোচনাত মিলিত নহওঁ, আমি তেওঁলোকক শত্ৰু জ্ঞান কৰো। আমি আমন্ত্ৰণ জনালেও নাযাওঁ।‘
আনহাতে, জাতীয়তাবাদী কোনো দল-সংগঠনকে আলোচনাৰ বাবে আমন্ত্ৰণ কৰিলেও অংশগ্ৰহণ নকৰাৰ বাবে তেওঁ আহ্বান জনায়।
ইয়াৰোপৰি তেওঁ চিআৰপিএফ নামৰ সংগঠনটো বিজেপি দলে নিজাববীয়াকৈ গঢ় দিয়া বুলি দাবী জনাই লগতে কয় ‘এজন হোজা মানুহেও এই কথাটো বুজি পাইছে যে এই সংগঠনৰ প্ৰতি বিজেপিৰ সমৰ্থন আছে। জনসাধাৰণৰ মাজত আতংকময় পৰিস্থিতি সৃষ্টি কৰিবৰ বাবে এনেধৰণৰ কিছুমান পাবত গজা সংগঠনক লৈ চৰকাৰী পৃষ্ঠপোষকতাতে উক্ত সমাবেশ অনুষ্ঠিত কৰিবৰ বাবে আগবঢ়াই দিছে।‘
আনহাতে, বৈশ্যই অসমক অশান্ত কৰিব খোজা এনেধৰণৰ পাবত গজা সংগঠনসমূহক অসম ত্যাগ কৰিবলৈ আহ্বান জনায়।
উল্লেখযোগ্য যে, পূৰ্বে ঘোষিত ‘খানাপাৰালৈ ব’লক’ কাৰ্য্যসূচী বাহাল ৰাখিব জাতীয়তাবাদ পুনৰ নিৰ্মাণ সমিতি, অসমে। এই সম্পৰ্কে অহা ২৭ অক্টোবৰত গুৱাহাটীত বিভিন্ন জাতীয় দল-সংগঠন আৰু জনসাধাৰণক লগত লৈ এক ৰাজহুৱা সভা আহ্বান কৰিছে।‘
