হলীউদৰ প্ৰসিদ্ধ অভিনেতা, বিশ্বৰ চলচ্চিত্ৰ প্ৰেমীৰ বাবে প্ৰথম জেমছ বণ্ড হিচাপে পৰিচিত ছিয়েন কনাৰিৰ দেহাৱসান ঘটিছে।
বাৰ্ধক্যজনিত সমস্যাত বিগত কেইবছৰ ধৰি ভূগি থকাৰ পাছত ৯০বছৰ বয়সত শনিবাৰে তেওঁৰ বিয়োগ ঘটে।
স্কটলেণ্ডৰ ছিয়েন কনাৰিয়ে মুঠতে সাতখন জেমছ বণ্ড চলচ্চিত্ৰত অভিনয় কৰিছিল।
১৯৬২চনৰ পৰা ১৯৮৩চনলৈকে তেওঁ একেৰাহে ইয়ান ফ্লেমিঙে সৃষ্টি কৰা জেমছ বণ্ড ছিৰিজৰ মুঠ সাতখন ছবিত অভিনয় কৰিছিল কনাৰিয়ে।
চলচ্চিত্ৰ সমালোচকসকলৰ মতে ৰূপালী পৰ্দাত তেওঁৰ দৰে জেমছ বণ্ডৰ চৰিত্ৰ আন কোনোৱে ফুটাই তুলিব পৰা নাই।
বণ্ড ছিৰিজৰ প্ৰথম পাঁচখন ছবি ‘ডাঃ নো’, ‘ফ্ৰম ৰাছিয়া উইথ লাভ’, ‘গ’ল্ড ফিংগাৰ’, ‘থাণ্ডাৰবল’ আৰু ‘ইউ অনলি লাইভ টুৱাইছ’ত গুপ্তচৰ জেমছ বণ্ডৰ ভূমিকাত তেওঁক দেখা গৈছিল।
ইয়াৰ পাছত তেওঁ বহু পলমকৈ ‘ডায়মণ্ডছ আৰ ফ’ৰইভাৰ’ আৰু ‘নেভাৰ ছে নেভাৰ এগেইন’ত পুনৰ বণ্ডৰ ভূমিকাত অৱতীৰ্ণ হৈছিল।
জেমছ বণ্ডৰ চৰিত্ৰৰ জৰিয়তে প্ৰসিদ্ধ হৈ পৰা কনাৰিয়ে ১৯৮৮চনত তেওঁৰ দ্য আনটাচ্চেৱল চলচ্চিত্ৰত কৰা অভিনয়ৰ বাবে শ্ৰেষ্ঠ অভিনেতাৰ অস্কাৰ বঁটালাভ কৰিছিল। তদুপৰি, তেওঁ আন কেইবাখনো উল্লেখযোগ্য চলচ্চিত্ৰতো অভিনয় কৰিছে।
আনহাতে, ছিয়েন কনাৰিয়ে অস্কাৰৰ উপৰি তিনিবাৰকৈ গ’ল্ডেন গ্লোব আৰু দুবাৰ বাফটা পুৰষ্কাৰেৰে সন্মানিত হৈছিল।
২০০০চনত ইংলেণ্ডৰ ৰাণী এলিজাবেথে তেওঁক নাইটহুড সন্মান প্ৰদান কৰে।
