কৰ’না ভাইৰাছে বৰ্তমান সমগ্ৰ বিশ্বতে সংহাৰী ৰূপ ধাৰণ কৰিছে৷ শেহতীয়া ভাৱে ভাৰতবৰ্ষতো বৃদ্ধি হৈছে আক্ৰান্তৰ সংখ্যা৷ অসমতো ২৬ জনলৈ বৃদ্ধি পাইছে আক্ৰান্তৰ সংখ্যা ৷
এই ২৬ জন আক্ৰান্তৰ ভিতৰত ২৫ জনেই হ’ল নিজামুদ্দিন মাৰ্কাজৰ সৈতে সম্পৰ্ক থকা লোক৷
নিজামুদ্দিনৰ পৰা অহা বহুকেইজন লোক বৰ্তমানো আত্মগোপন কৰি আছে বুলি জানিব পৰা গৈছে৷
অসম ৰাজ্যিক জমিয়ত উলেমাই নিজামুদ্দিৰ লগত জড়িত সকলো লোককে নিজৰ স্বাস্থ্য পৰীক্ষা কৰাৰ লগতে ল’কডাউন মানি চলিবলৈ আহ্বান জনাইছে৷
অসম ৰাজ্যিক জমিয়ত উলেমাৰ সভাপতি হজৰত মৌলনা মুস্তাফাৰ নিৰ্দেশত মৌলানা কলিমুউদ্দিনে কয় যে দিল্লী নিজামুদ্দিন মাৰ্কাজৰ পৰা তবলিগীৰ লগত জড়িত লোক তথা বহিৰাজ্যত থকা যিকোনো লোক ইতিমধ্যে অসমত প্ৰৱেশ কৰিছে আৰু স্বাস্থ্য পৰীক্ষা কৰোৱা হোৱা নাই৷
তেওঁলোকে অতি শীঘ্ৰে ওচৰৰ স্বাস্থ্য কেন্দ্ৰৰ লগত যোগাযোগ কৰি নিজৰ স্বাস্থ্য পৰীক্ষা কৰি ৰাজ্যখনক ৰক্ষাৰ বাবে সহযোগিতা আগবঢ়াবলৈ ৰাজ্যিক জমিয়ত উলেমাৰ পৰা বিনম্ৰ অনুৰোধ জনাইছে৷
লগতে ক’ৰ’না ৰোধৰ বাবে অহৰহ যুঁজি থকা ৰাজ্য চৰকাৰ, প্ৰসাশন আৰু স্বাস্থ্য বিভাগক ধন্যবাদ জনায় কয় যে আৰম্ভণিৰ পৰা এতিয়ালৈ অসম চৰকাৰ, ৰাজ্যৰ প্ৰশাসন আৰু স্বাস্থ্য বিভাগে আমাক ৰক্ষাৰ বাবে যি অহৰহ চেষ্টা অব্যাহত ৰাখিছে তেওঁলোকক আমি ধন্যবাদ জনাইছো ৷
আনহাতে ল’কডাউন শেষ নহোৱা পৰ্যন্ত সকলোকে স্বাস্থ্য বিভাগ, ৰাজ্য চৰকাৰৰ প্ৰতিটো নিৰ্দেশনা সকলোকে মানি চলিব বুলি ৰাজ্যিক জমিয়ত উলেমাই বিনম্ৰ বাবে অনুৰোধ জনায় ৷
