আই এছ এলৰ ছেমি ফাইনেলত প্ৰৱেশৰ বাবে স্বাভাৱিকতে যৎপৰোনাস্তি চেষ্টা চলাইছিল নৰ্থ-ইষ্টে। কিন্তু প্লে অফৰ খেলখনত অৱশেষত নৰ্থইষ্ট ইউনাইটেডক ২-০ গ’লত পৰাস্ত কৰি জয়লাভ কৰে জামছেদপুৰ এফ চিয়ে।
জামছেদপুৰৰ হৈ ষ্টিফেন এ জে আৰু জেভি হাৰ্নাণ্ডেজে গ’ল দিয়ে। এইবাৰ আই এছ এল লীগ শ্বিল্ড বিজয়ী মোহন বাগানে ছেমিফাইনেলত জামছেদপুৰৰ বিৰুদ্ধে খেলিব।
কিন্তু আচৰিত কথাটো হ’ল দেওবাৰে খেলখনত নৰ্থইষ্টৰ হাতত প্ৰায় ৭০ শতাংশ বলৰ দখল আছিল। আনকি মুঠ শ্বটৰ ক্ষেত্ৰতো আগবাঢ়ি আছিল দলটো। কিন্তু ষ্টিফেন এজৰ গ’লে পাৰ্থক্য আনি দিয়ে। খেলখনৰ ২৯ মিনিটত তেওঁ পেনাল্টি বক্সৰ সোঁফালে বলটো লাভ কৰে। তাৰ পাছত গুৰপ্ৰীত সিঙক সোঁ ভৰিৰে শক্তিশালী শ্বটেৰে পৰাস্ত কৰি বলটো পোনে পোনে নেটত সুমুৱাই দিলে।
কিন্তু কেৱল গ’ল দিয়াই নহয়। দলৰ স্বাৰ্থত তেওঁ দুৰ্দান্ত ডিফেন্সো কৰিছিল। আনহাতে, এলবিনো গোমেজে ৰিডিম লেঙৰ শ্বটটো ৰক্ষা কৰে। তদুপৰি জিতিনৰ এটা শ্বট অলপৰ বাবে লক্ষ্যভ্ৰষ্ট হয়। নহ’লে তাৰ পৰাই গ’ল আহিলেহেঁতেন৷ ইপিনে, খেলৰ ৮৮ মিনিটত জামছেদপুৰ এফ চিৰ মোবাশ্বিৰ ৰহমানে পুনৰ ৰঙা কাৰ্ডৰ সন্মুখীন হয়।
খেলখনৰ শেষৰ ফালে ক্ৰমান্বয়ে নৰ্থ-ইষ্টে চাপ বৃদ্ধি কৰিবলৈ আৰম্ভ কৰে। এটা সময়ত এনে লাগিছিল যেন খেলখনৰ ফলাফল হয়তো বেলেগ হ’ব পাৰে। কিয়নো, একাধিক স্ক’ৰ কৰাৰ সুযোগ আছিল। কিন্তু খেলখনৰ গতিৰ বিপৰীতেহে গ’ল হয়।
খেলখনৰ একেবাৰে শেষ মুহূৰ্তত জেভি হাৰ্নাণ্ডেজে দ্বিতীয়টো গ’ল দিয়ে। পেনাল্টি বক্সৰ সোঁফালৰ পৰা বলটো ক্ৰছ কৰে ঋত্বিক দাসে। আৰু বলটো লাভ কৰাৰ লগে লগে জাভিয়ে খালী গ’লপোষ্টত বলটো ঠেলি সুমুৱাই দিয়ে। তাৰ ফলতেই খালিদ জামিলৰ দলটোৱে নৰ্থ-ইষ্ট ইউনাইটেডক ২-০ গ’লত পৰাস্ত কৰি ছেমি ফাইনেলত প্ৰৱেশ কৰে।
