আজি ভগৱান বিষ্ণুৰ অষ্টম অৱতাৰ শ্ৰী কৃষ্ণৰ বাৰ্ষিক জন্মোৎসৱ। ভাৰতবৰ্ষৰ বিভিন্ন প্ৰান্তত কৃষ্ণ জন্মাষ্টমী, কৃষ্ণাষ্টমী, গকুলাষ্মী, অষ্টমী ৰোহিণী, শ্ৰীকৃষ্ণ জয়ন্তী আদি নামেৰে এই উৎসৱ পালন কৰা হয়।
এই উপলক্ষে সত্ৰ সংস্কৃতিৰ প্ৰাণকেন্দ্ৰ মাজুলীৰ সত্ৰসমূহৰ লগতে গাঁৱৰ নামঘৰ সমূহত জন্মাষ্টমী উদযাপন কৰা হৈছে। পুৱাৰে পৰা জন্মাষ্টমীৰ নামেৰে মাজুলীৰ নামঘৰ সমূহ মূখৰিত হৈ পৰাৰ লগতে আকাশে বতাহে বিয়পি পৰিছে হৰি নামৰ ধ্বনি।
উল্লেখযোগ্য যে কৃষ্ণৰ জন্ম হওঁতে নন্দই সকলোকে উপহাৰ বিলোৱাৰ কাহিনী উদযাপন কৰিবলৈ কৃষ্ণ জন্মাষ্টমীৰ দুদিনৰ পিছত মাজুলীৰ বিভিন্ন স্থানৰ নামঘৰত আয়তি সকলে নন্দোৎসৱ পালন কৰে।
জন্মাষ্টমী উপলক্ষে আজি মাজুলীৰ মিচিং বসতিপ্ৰধান ২নং বৰগঞাৰ নামঘৰত গুৰুৰ আসন প্ৰতিস্থা কৰা হয়। ৬০০ টা মিচিং পৰিয়ালৰ আধ্যাত্মিক কেন্দ্ৰস্থল এই নামঘৰত অঞ্চলটোৰ সকলো লোকৰে উপস্থিতিত আধ্যাত্মিক ৰীতি নীতিৰে গুৰুৰ আসন প্ৰতিস্থা কৰে বৰ এলেঙি সত্ৰৰ সত্ৰাধিকাৰ ভৱানন্দ দেৱ গোস্বামীয়ে।
