ঝাৰখণ্ডৰ বিধানসভা নিৰ্বাচনৰ পৰিপ্ৰেক্ষিতত ঝাৰখণ্ড মুক্তি মৰ্চাই মহিলাৰ বাবে ৩৩ শতাংশ সংৰক্ষণৰ প্ৰতিশ্ৰুতি দি যোৱা ১১ নৱেম্বৰত ইস্তাহাৰ প্ৰকাশ কৰে। এই ঘোষণাৰ অধীনত ৰাজ্য চৰকাৰৰ চাকৰিত মহিলাসকলে লাভ কৰিব ৩৩ শতাংশ সংৰক্ষণ। এই প্ৰতিশ্ৰুতি এন ডি এৰ মিত্ৰ সদৌ ঝাৰখণ্ড ষ্টুডেণ্টছ ইউনিয়ন (এজেছু)য়েও দিছিল।
ঝাৰখণ্ডত মহিলাৰ ব্যাপক অংশগ্ৰহণ আৰু বহু বিধানসভা সমষ্টিত মহিলা ভোটাৰে নিৰ্ণায়ক ভূমিকা পালন কৰে। ৰাজ্যত মহিলা ভোটাৰৰ সংখ্যা আৰু অনুপাতও বৃদ্ধি পাইছে।
আন ৰাজ্যতো এনে প্ৰতিশ্ৰুতি দিয়া হৈছে। মধ্যপ্ৰদেশ, ৰাজস্থান, উত্তৰাখণ্ড, পঞ্জাৱ, বিহাৰ, গুজৰাট, কৰ্ণাটক, ত্ৰিপুৰাৰ দৰে ৰাজ্যতো চৰকাৰী চাকৰিত থকা মহিলাসকলৰ বাবে সংৰক্ষণ ব্যৱস্থা ৰূপায়ণ কৰা হৈছে। এই ৰাজ্যসমূহত মহিলাসকলক চৰকাৰী চাকৰিত ৩০-৩৫ শতাংশ সংৰক্ষণ দিয়া হৈছে, যিটো মহিলা সবলীকৰণৰ দিশত এক গুৰুত্বপূৰ্ণ পদক্ষেপ হিচাপে বিবেচিত হৈছে।
ঝাৰখণ্ডত মুঠ ৮১খন বিধানসভাৰ আসন, ইয়াৰে ২৮খন আসন আদিবাসীৰ বাবে সংৰক্ষিত। ১৩ আৰু ২০ নৱেম্বৰত দুটা পৰ্যায়ত অনুষ্ঠিত হ’ব নিৰ্বাচন আৰু ২৩ নৱেম্বৰত ফলাফল ঘোষণা কৰা হ’ব।
