ৰাজ্যখনত মাস্ক নিপিন্ধিলে ১লাখ টকা জৰিমনা, লকডাউন উলংঘা কৰিলে হ’ব ২বছৰৰ কাৰাবাস!
কৰ’না ভাইৰাছৰ সংক্ৰমণ ৰোধ কৰিবলৈ এইবাৰ কঠোৰ পদক্ষেপ গ্ৰহণ কৰিছে দেশৰ এইখন ৰাজ্য চৰকাৰে।
চৰকাৰে ঘোষণা কৰিছে যে মাস্ক পৰিধান নকৰিলে ১লাখ টকা জৰিমনা আৰু লকডাউন অমান্য কৰিলে ২বছৰৰ কাৰাবাস খাটিব লাগিব।
বাতৰি অনুসৰি,সংক্ৰামক ৰোগ অধ্যাদেশ ২০২০গৃহীত কৰিছে ঝাৰখণ্ড চৰকাৰে।
এই অধ্যাদেশৰ আওতাত এইবাৰৰ পৰা লকডাউনৰ ক্ষেত্ৰত কিছু নতুন নিয়ম প্ৰৱৰ্তন কৰা হৈছে।
ৰাজ্যখনত দ্ৰুতগতিত বৃদ্ধি পোৱা কৰ’না ভাইৰাছৰ সংক্ৰমণত ৰাজ্য চৰকাৰ উদ্বিগ্ন হৈ পৰিছে।
সেয়েহে, যেনেতেনে কৰ’নাৰ সংক্ৰমণৰ তীব্ৰতা ৰোধ কৰিবলৈ কঠোৰ হৈ পৰিছে চৰকাৰখন।
ৰাজ্যখনৰ স্বাস্থ্য মন্ত্ৰী বন্না গুপ্তাই জানিবলৈ দি কয়,’’অধ্যাদেশখন এতিয়াও সম্পূৰ্ণভাৱে বলবৎ কৰা হোৱা নাই। কাৰোবাক জৰিমনা বিহিলে, তেওঁৰ ওপৰত চলা গোচৰত তেওঁ দোষী সাৱ্যস্ত হ’লে ১লাখ টকা জৰিমনা আদায় দিব লাগিব।‘’
অৱশ্যে, স্পট চেকিঙৰ সময়ত মাস্ক নিপিন্ধা পালেই তেতিয়াই তেওঁ ১লাখ টকা জৰিমনা দিব নালাগে।
স্বাস্থ্য মন্ত্ৰীগাৰীকয়ে কয় যে ৰাজ্য চৰকাৰখনে সকলোধৰণে কৰ’নাৰ বিৰুদ্ধে যুঁজ চলাইছে।
আনহাতে, নতুন নিয়ম অনুসৰি, লকডাউন উলংঘা কৰি কোনোৱে দোষী সাৱ্যস্ত হ’লে ২বছৰ পৰ্যন্ত কাৰাবাস হ’ব পাৰে।