আজি মুক্তি পাবলগীয়া বিশিষ্ট চলচ্চিত্ৰ নিৰ্মাতা জাহ্নু বৰুৱা পৰিচালিত ‘ভগা খিৰিকি’ৰ মুক্তি স্থগিত ৰখা হৈছে। গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱৰ কালি উদ্বোধনীৰ দিনা ‘ভগা খিৰিকি’ প্ৰদৰ্শিত হৈছিল।
গুৱাহাটীৰ শ্ৰীমন্ত শংকৰদেৱ কলাক্ষেত্ৰত আজি সংবাদ মাধ্যমৰ সৈতে হোৱা এক মত বিনিময় অনুষ্ঠানত এই কথা সদৰী কৰা হৈছে। ছবিখনৰ প্ৰযোজক শ্বাহনাব আলমে জানিব দিয়ে যে এমাহৰ ভিতৰতে ছবিখনৰ মুক্তি দিয়া হ’ব।
অনুষ্ঠানত পৰিচালক জাহ্নু বৰুৱাই কয় যে তেওঁ চাৰে চাৰি বছৰ পিছত এই ছবিখন নিৰ্মাণ কৰিছে। ছবিখনৰ চিত্ৰগ্ৰহণ কাজিৰঙাৰ আশে পাশেই সম্পন্ন কৰা হৈছে।
হিন্দী ছবিৰ লবীৰ বিষয়ে ক’বলৈ গৈ বৰুৱাই কয়, ‘’ অসমীয়া চলচ্চিত্ৰ উদ্যোগৰ বাবে ই সদায় সমস্যাৰ সৃষ্টি কৰি আহিছে। মুক্তিৰ দিন এটা পোৱাটো কঠিন হৈ পৰে কিয়নো এই বিষয়ে বহু কথা চিন্তা কৰিবলগীয়া হয়। কিন্তু এতিয়াও অসমীয়া চলচ্চিত্ৰ উদ্যোগ এক ভাল স্থানতে আছে।‘’
চলচ্চিত্ৰখনত অভিনয় কৰা অভিনেত্ৰী জেৰিফা ৱাহিদে ছবিখনত তেওঁৰ কাম কৰাৰ অভিজ্ঞতাৰ বিষয়ে কয়। তেওঁ কয়, ‘’মই মৌলিক বিষয়বস্তুৰ ওপৰত নিৰ্মিত ছবিত অভিনয় কৰি ভাল পাওঁ যিটো জাহ্নু বৰুৱাই সদায় কৰি আহিছে। মই ভগা খিৰিকিত অভিনয় কৰি সন্তুষ্ট।‘’
জেৰিফাই লগতে কয় যে চলচ্চিত্ৰক কেৰিয়াৰ হিচাপে লোৱাটো সঁচাকৈয়ে কঠিন বিশেষকৈ অসমৰ দৰে ঠাইত য’ত বহুত সংগ্ৰাম কৰিবলগীয়া হয়।
চলচ্চিত্ৰখনৰ মুখ্য চৰিত্ৰত জেৰিফাই অভিনয় কৰিছে। ছবিখনত অভিনয় কৰা আন শিল্পীসকলৰ ভিতৰত আছে সীমা বিশ্বাস, জয় কাশ্যপ আৰু ৰাষ্ট্ৰীয় বঁটা বিজয়ী বিষ্ণু খাৰঘৰীয়াৰ লগতে আন বহুতে। প্ৰায় ৩.৫ কোটি টকা ব্যয় সাপেক্ষে ছবিখন নিৰ্মাণ কৰি উলিওৱা হৈছে।
ছবিখনৰ বিষয়ে ক’বলৈ গৈ জাহ্নু বৰুৱাই ছবিখন প্ৰতীকধৰ্মী বুলি উল্লেখ কৰি কয়, ‘’ভগা খিৰিকি’’য়ে অসমক প্ৰতিনিধিত্ব কৰিছে আৰু মুখ্য চৰিত্ৰ তগৰে সাম্প্ৰতিক সমাজখনক প্ৰতিনিধিত্ব কৰিছে।‘’
তেওঁ লগতে কয়, ‘’ মই সদায় মোৰ জীৱনৰ কাহিনী ক’ব বিচাৰো। বৰ্তমানৰ প্ৰতিযোগিতামূলক পৃথিৱীত আমাৰ সমাজখন শক্তিশালী তথা অধিক সুযোগ্য কৰি তুলিবলৈ বিশ্বৰ আগত নিজক দাঙি ধৰাৰ অন্যতম শ্ৰেষ্ঠ মাধ্যম হৈছে চলচ্চিত্ৰ।‘’
এই চলচ্চিত্ৰখন প্ৰযোজনা কৰিছে অসম পৰ্যটনৰ ব্ৰেণ্ড এম্বেছাদৰ প্ৰিয়ংকা চোপ্ৰাৰ কোম্পানী পাৰ্প’ল পেব’ল পিকছাৰছ আৰু মুম্বাইৰ এটি কোম্পানী এষ্টাৰ্লী এন্টাৰটেইমেন্টে।
