নাগৰিকত্ব বিধেয়ক বাতিলৰ দাবীত সমগ্ৰ ৰাজ্যত প্ৰতিবাদৰ জোৱাৰ। ৰাজ্যৰ বিভিন্ন দল-সংগঠনে ব্যাপক ৰূপত কেবৰ বিৰোধিতা কৰি প্ৰতিবাদ সাব্যস্ত কৰিছে।
ইয়াৰ মাজতে ‘কেব’ৰ বিৰোধিতা কৰি মন্তব্য আগবঢ়াই আলফা নেতা জীতেন দত্তই। তেওঁ কালি এক কেব বিৰোধী প্ৰতিবাদী কাৰ্যসূচীত অংশ গ্ৰহণ কৰি কয় যে নাগৰিকত্ব সংশোধনী বিধেয়কৰ বিৰোধে সৰু-সুৰা আন্দোলন কৰি লাভ নাই।
বিপৰীতে সকলো দল-সংগঠন লগ হৈ তথা একত্ৰিত হৈ দিল্লী কঁপোৱা আন্দোলন কৰিব লাগিব বুলি আলফা নেতা গৰাকীয়ে উল্লেখ কৰে।
জীতেন দত্তই কয় যে, “দিল্লীয়ে আন্দোলন সমূহ দুৰ্বল বুলি ভাবি লৈছে। ইতিমধ্যে হিমন্ত বিশ্ব শৰ্মাই অসমৰ আন্দোলন সমূহ ইমান শক্তিশালী হোৱা নাই বুলি কৈছেই। গতিকে দিল্লীক কথা শুনাবলৈ হ’লে অৰ্থনৈতিক অৱৰোধ কৰিব লাগিব।”
তেওঁ কয় যে অৰ্থনৈতিক অৱৰোধৰ অবিহনে আন কোনো উপায় নাই। অৰ্থনৈতিক অৱৰোধ কৰিলেহে দিল্লীয়ে অসমীয়াৰ প্ৰতিবাদ শুনিবলৈ চেষ্টা কৰিব।
তাৰোপৰি বিজেপিয়ে কেব আনিবই গতিকে অসমবাসীৰ হাতত বিকল্প এটাই আছে সেয়া হৈছে আইনী প্ৰক্ৰিয়া। এই বুলি উল্লেখ কৰি জীতেন দত্তই কয় যে, “মই নিজে অতি সোনকালে কেবৰ বিৰুদ্ধে উচ্চতম ন্যায়ালয়ৰ দ্বাৰস্থ হ’ম।”
