Jnanpith Award : নতুন বছৰৰ প্ৰাকক্ষণত অসমলৈ আহিছে এক সুখবৰ।
ৰাজ্যৰ এগৰাকী বিশিষ্ট কবি নীলমণি ফুকনলৈ আগবঢ়োৱা হৈছে জ্ঞানপীঠ বঁটা।
‘গোলাপী জামুৰ লগ্ন’ৰ কবি নীলমণি ফুকনলৈ জ্ঞানপীঠ বঁটা আগবঢ়োৱাৰ খবৰ বিয়পি পৰাৰ লগে লগে ৰাজ্যবাসীৰ মাজত আনন্দৰ লহৰ উঠা পৰিলক্ষিত হৈছে।
উল্লেখ্য নীলমণি ফুকন হৈছে জ্ঞানপীঠ বঁটা লাভ কৰা তৃতীয়গৰাকী অসমীয়া ।
তেওঁৰ পূৰ্বে বীৰেন্দ্ৰ কুমাৰ ভট্টাচাৰ্য আৰু মামনি ৰয়চম গোস্বামীলৈ আগবঢ়োৱা হৈছিল জ্ঞানপীঠ বঁটা।
নীলমণি ফুকনলৈ জীৱনজোৰা সাধনাৰ বাবে আগবঢ়োৱা হৈছে এই বঁটা।
নীলমণি ফুকনৰ উল্লেখযোগ্য সৃষ্টিৰাজি হৈছে ক্ৰমে ‘সূৰ্য হেনো নামি আহে এই নদীয়েদি’, ‘কবিতা’, আৰু ‘গোলাপী জামুৰ লগ্ন’।
বিশিষ্ট কবিগৰাকীৰ জন্ম হৈছিল ১৯৩৩ চনৰ ১০ ছেপ্তেম্বৰত গোলাঘাট জিলাৰ দেৰগাঁৱত।
ইতিহাস বিষয়ত ১৯৬১ চনত তেওঁ গুৱাহাটী বিশ্ববিদ্যালয়ৰ পৰা স্নাতকোত্তৰ ডিগ্ৰী লাভ কৰে।
নীলমণি ফুকনে ১৯৫০ চনৰ পৰাই কবিতা লিখিবলৈ আৰম্ভ কৰে। তেওঁৰ কবিতাত ফৰাচী দৃশ্যপটৰ অৱলোকন হোৱা পৰিলক্ষিত হয়।
১৯৮১ চনত তেওঁ ‘কবিতা’ গ্ৰন্থৰ বাবে সাহিত্য অকাডেমী বঁটা লাভ কৰিছিল।
নীলমণি ফুকনে ১৯৬৪ চনত গুৱাহাটীৰ আৰ্য বিদ্যাপীঠ মহাবিদ্যালয়ত অধ্যাপক হিচাপে যোগদান কৰি ১৯৯২ চনত অৱসৰ গ্ৰহণ কৰিছিল।
নিজস্ব শৈলীৰে কবিতা ৰচনা কৰি নীলমণি ফুকনে অসমীয়া সাহিত্যত এক নতুন ধাৰাৰ সৃষ্টি কৰিবলৈ সক্ষম হৈছে।
