চেলিব্ৰিটি দম্পতী জো জ’নাছ আৰু ছোফি টাৰ্নাৰৰ ঘৰ ভাঙিছে। যোৱা মঙলবাৰে জ’ৱে আমেৰিকাৰ মিয়ামিৰ এখন আদালতত ছোফিৰ বিৰুদ্ধে বিবাহ বিচ্ছেদৰ বাবে আবেদন জনাইছিল। বিবাহ বিচ্ছেদৰ আবেদনত দাখিল কৰা তথ্য অনুসৰি দুয়োৰে মাজত এতিয়া সম্পৰ্ক জোৰা লগাৰ আৰু কোনো ৰাস্তা নাই।
আন্তৰ্জাতিক সংবাদ মাধ্যমৰ বাতৰি অনুসৰি, জো আৰু ছোফিয়ে উমৈহতীয়াভাৱে তেওঁলোকৰ এই বিবাহ বিচ্ছেদৰ সিদ্ধান্ত লৈছে ।
ব্ৰিটিছ অভিনেত্ৰী ছোফি টাৰ্নাৰ “গেম অৱ থ্ৰ’নছ”ৰ জৰিয়তে সমগ্ৰ বিশ্বতে বহুলভাৱে পৰিচিত হয়। আনহাতে, জো জ’নাছ এজন সংগীতজ্ঞ আৰু অভিনেতা। তেওঁ প্ৰিয়ংকা চোপ্ৰাৰ স্বামী নিক জোনাছৰ ভাতৃ। তেওঁলোকৰ বেণ্ড Jonas Brothers যুৱক-যুৱতীসকলৰ মাজত অতি জনপ্ৰিয়।
২০১৬ চনৰ পৰাই জো আৰু ছোফিয়ে ডেটিং আৰম্ভ কৰিছিল। পিছৰ বছৰৰ অক্টোবৰ মাহত তেওঁলোকৰ এংগেজমেণ্ট হৈছিল। ২০১৯ চনৰ ১ মে’ত লাছ ভেগাছত বিবাহপাশত আবদ্ধ হয় দুয়োগৰাকী তাৰকাই।
বৈবাহিক জীৱনৰ চাৰি বছৰত জো আৰু ছোফিৰ দুগৰাকী কন্যা সন্তান জন্ম হয়।
আমেৰিকাৰ সংবাদ মাধ্যমত জো জ’নাছ আৰু ছোফি টাৰ্নাৰৰ বিচ্ছেদৰ কাৰণ সম্পৰ্কে দীঘলীয়া প্ৰতিবেদন প্ৰকাশ পাইছে। সেই অনুসৰি দুয়োগৰাকী তাৰকা পৃথক হোৱাৰ কাৰণ হ’ল তেওঁলোকৰ মাজত ব্যক্তিত্বৰ পাৰ্থক্য।
তাৰকা দুগৰাকীৰ ঘনিষ্ঠ সূত্ৰই জনোৱা মতে, জো আৰু ছোফিৰ ব্যক্তিত্ব সম্পূৰ্ণ বেলেগ। জো অন্তৰ্মুখী, কামৰ বাহিৰে ঘৰতে বাকী সময় কটাবলৈ ভাল পায়। আনহাতে, ছোফি আমোদপ্ৰিয়, সদায় পাৰ্টিত ব্যস্ত থাকে। যোৱা কেইমাহমানৰ পৰা সৰু ছোৱালীজনীক বেছিভাগ জোৱে নিজেই চোৱা-চিতা কৰি আহিছে।
জানিব পৰা মতে, কেইবামাহো পূৰ্বেই জো আৰু ছোফিৰ সম্পৰ্কত ফাট মেলিছিল। কিন্তু তেওঁলোকে এতিয়াও চূড়ান্ত সিদ্ধান্ত লোৱা নাছিল। কিন্তু পিছত যেতিয়া তেওঁলোকে দেখিলে যে সম্পৰ্ক ৰক্ষা কৰাৰ কোনো উপায় নাই, তেতিয়া তেওঁলোকে চাৰি বছৰীয়া বৈবাহিক জীৱনৰ অন্ত পেলোৱাৰ সিদ্ধান্ত ল’লে।
