সমাগত নিৰ্বাচনকলৈ প্ৰশাসনযন্ত্ৰ ব্যস্ত থকাৰ সময়তে বুধবাৰে এক সভাত স্বাস্থ্য বিভাগৰ যুটীয়া স্বাস্থ্য সঞ্চালকক একাংশ ক্ষোভিত এন এইচ এম কৰ্মীয়ে ঘেৰাও কৰি বিভিন্ন প্ৰশ্নৰে ব্যতিব্যস্ত কৰি তোলা ঘটনাই গোলাঘাট জিলাত চাঞ্চল্যৰ সৃষ্টি কৰিছে।
প্রাপ্ত তথ্য অনুসৰি বুধবাৰে দুপৰীয়া সঞ্চালকৰ কাৰ্যালয়ৰ কাষতে থকা প্ৰশিক্ষণ কেন্দ্ৰত এন এইচ এম কৰ্মীসকলৰ প্ৰশিক্ষণ সম্পৰ্কীয় এক সভা অনুষ্ঠিত হৈছিল। উক্ত সভাত যুটীয়া সঞ্চালকগৰাকীৰ লগতে এন এইচ এমৰ জিলা বিষয়া নম্ৰতা শৰ্মা উপস্থিত আছিল। সভা চলি থকাৰ মাজতে এন এইচ এম কৰ্মীসকলে তেওঁলোকক প্ৰদান কৰি অহা গ্ৰেড ব্যৱস্থাত সন্দেহ প্ৰকাশ কৰি সঞ্চালক আৰু জিলা বিষয়াগৰাকীক নানান প্ৰশ্ন অৱতাৰণা কৰে।
জানিব পৰা মতে এই কৰ্মীসকলক উৎসাহিত কৰিবৰ বাবে তেওঁলোকৰ সেৱামূলক কাম-কাজসমূহ নিৰীক্ষণ কৰি উৰ্ধতম কৰ্তৃপক্ষই এ, বি, চি, ডি গ্ৰেড প্ৰদান কৰি আহিছে আৰু উক্ত গ্ৰেড অনুসৰিয়েই তেওঁলোকৰ দৰমহা নিৰ্ধাৰণ হয়। বিগত সময়চোৱাত জিলাখনৰ বহুসংখ্যক এনে কৰ্মীয়ে এ বি গ্ৰেড লাভ কৰিছে। আনকি কেইবাগৰাকী এন এইচ এম কৰ্মীয়ে বিভাগীয়ভাৱে আৰু প্ৰশাসনৰ তৰফৰ পৰা পুৰস্কাৰো লাভ কৰিছে।
কিন্তু শেহতীয়াকৈ তেনে ৪২১ গৰাকী কৰ্মীক এইবাৰ বিভাগে চি গ্ৰেড দিয়ে। ফলত এই সমগ্ৰ গ্ৰেড ব্যৱস্থাটোতে আস্থাহীন হৈ আজি কৰ্মীসকলে বিভাগীয় কৰ্তৃপক্ষৰ পৰা সুদত্তৰ বিচাৰি ব্যতিব্যস্ত কৰি তোলে।
অৱশ্যে পাছত যুটীয়া সঞ্চালক গৰাকীয়ে সমগ্ৰ বিষয়টো উৰ্ধতম কৰ্তৃপক্ষৰ সৈতে আলোচনাৰ আশ্বাস দিয়াত পৰিস্থিতি শাম কাটে। উল্লেখযোগ্য যে জিলাখনত ৪৩৬ গৰাকী এনে কৰ্মী আছে। আনহাতে উক্ত গ্ৰেড ব্যৱস্থাৰ বাবে একাংশ চিকিৎসকো প্ৰাপ্যৰ পৰা বঞ্চিত হোৱাৰ অভিযোগ উঠিছে।
