ৰাজ্যৰ উচ্চশিক্ষাৰ অন্যতম প্ৰতিষ্ঠান ডিব্ৰুগড় বিশ্ববিদ্যালয়ৰ ঘৃণনীয় ৰেগিং কাণ্ডই ৰাজ্যজুৰি সৃষ্টি কৰা চাঞ্চল্যৰ ঢৌ মাৰ নাযাওঁতেই এইবাৰ পোহৰলৈ আহিছে আন এক ৰেগিং কাণ্ড। এইবাৰ এই ৰেগিং কাণ্ডৰ অভিযোগ উত্থাপন কৰিছে যোৰহাট জিলাৰ অগ্ৰণী শিক্ষা প্ৰতিষ্ঠান জগন্নাথ বৰুৱা মহাবিদ্যালয়ত অধ্যয়নৰত এগৰাকী ছাত্ৰই।
ডিব্ৰুগড় বিশ্ববিদ্যালয়ৰ এগৰাকী ছাত্ৰই দেওবাৰে বিশ্ববিদ্যালয়ৰ কেম্পাছৰ হোষ্টেলৰ দুমহলীয়া অট্টালিকাৰ পৰা জপিয়াই পৰাৰ এদিন পিছতে হোষ্টেল আবাসী জ্যেষ্ঠ ছাত্ৰৰ দ্বাৰা চৰম মানসিক আৰু শাৰীৰিক হাৰাশাস্তিৰ সন্মুখীন হোৱাৰ অভিযোগ উত্থাপন কৰিছে জে বি কলেজৰ শিক্ষাৰ্থীগৰাকীয়ে।
জগন্নাথ বৰুৱা মহাবিদ্যালয়ত অধ্যয়নৰত প্ৰণৱ চুতীয়া নামৰ বি.কম প্ৰথম ষান্মাসিকৰ ছাত্ৰ এগৰাকীয়ে জেষ্ঠ ছাত্ৰই তেওঁৰ ওপৰত তীব্ৰ মানসিক আৰু শাৰীৰিক নিৰ্যাতন চলোৱাৰ অভিযোগ উত্থাপন কৰি কলেজ হোষ্টেল ত্যাগ কৰে।
এই সন্দৰ্ভত ছাত্ৰগৰাকীয়ে কয়, “মহাবিদ্যালয়ৰ ছৈয়দ আব্দুল মালিক হোষ্টেলত চিনিয়ৰসকলে মোক অত্যাচাৰ কৰিছিল। জ্যেষ্ঠ ছাত্ৰ-ছাত্ৰীসকলে মোক প্ৰতিদিনে দুপৰীয়া শাস্তি দিছিল। মোক ৰাতি শুবলৈ দিয়া হোৱা নাছিল। এনে অত্যাচাৰ মোৰ বাবে সম্পূৰ্ণ অসহ্যকৰ আছিল। মই পঢ়া-শুনাত মনোনিৱেশ কৰিব পৰা নাছিলো।”
ছাত্ৰজনে লগতে কয় যে ৰেগিঙৰ পৰা ৰেহাই নোপোৱাৰ বাবেই তেওঁ হোষ্টেলৰ পৰা ওলাই আহিবলৈ বাধ্য হৈছিল। ইফালে মহাবিদ্যালয় হোষ্টেল ত্যাগ কৰি বাহিৰত থাকিবলগীয়া হোৱাৰ বাবে এতিয়া ছাত্ৰগৰাকীৰ প্ৰয়োজনীয় খৰচ বহন কৰাটো তেওঁৰ পৰিয়ালৰ বাবে কঠিন হৈ পৰিছে বুলি প্ৰণৱ চুতীয়া নামৰ ছাত্ৰগৰাকীয়ে দুখ প্ৰকাশ কৰিছে।
ছাত্ৰগৰাকীৰ এই অভিযোগৰ পিছত মহাবিদ্যালয়খনৰ অধ্যক্ষ উৎপল জ্যোতি মহন্তৰ সৈতে যোগাযোগ কৰা হয় যদিও তেওঁ এই বিষয়ত কোনো মন্তব্য দিবলৈ অস্বীকাৰ কৰে।
উল্লেখ্য যে হোষ্টেল আবাসী জেষ্ঠ ছাত্ৰৰ দ্বাৰা ৰেগিঙৰ নামত অমানুষিক অত্যাচাৰৰ সন্মুখীন হোৱাৰ অভিযোগত শেহতীয়াকৈ ডিব্ৰুগড় বিশ্ববিদ্যালয়ৰ এম.কমৰ প্ৰথম ষান্মাসিকৰ আনন্দ শৰ্মা নামৰ এগৰাকী ছাত্ৰই হোষ্টেলৰ দুমহলীয়া অট্টালিকাৰ পৰা জপিয়াই আত্মহত্যাৰ চেষ্টা কৰিছিল।
গুৰুতৰভাৱে আহত ছাত্ৰগৰাকী বৰ্তমান ডিব্ৰুগড়ৰ এখন ব্যক্তিগত চিকিৎসালয়ৰ আই চি ইউত চিকিৎসাধীন হৈ আছে। এই ঘটনা পোহৰলৈ অহাৰ পিছতে ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছিল।
ডিব্ৰুগড় বিশ্ববিদ্যালয়ৰ কৰ্তৃপক্ষই সোমবাৰে এই ঘটনাত জড়িত থকাৰ অভিযোগত ১৮ গৰাকী ছাত্ৰক নিলম্বন কৰিছে। ইফালে আৰক্ষীয়ে এই কাণ্ডত জড়িত থকাৰ অভিযোগত তিনিজন ছাত্ৰক গ্ৰেপ্তাৰ কৰিছে। আনহাতে মুখ্য অভিযুক্ত হিচাপে নাম উচ্চাৰিত হোৱা ৰাহুল ছেত্ৰী এতিয়াও পলাতক অৱস্থাত আছে।
