মিৰ’ৰ অব আসাম নামৰ ব্যক্তিগত ৱেব পৰ্টেলৰ সাংবাদিক মানস জ্যোতি বৰুৱাক আজি জেৰাৰ বাবে মাতি পঠিওৱা হয় সোণাপুৰস্থিত NIA ৰ মুখ্য কাৰ্য্যালয়লৈ।
প্ৰায় ১২:৩০ বজাত কাৰ্য্যালয়ত উপস্থিত হোৱা বৰুৱাক বিয়লি ৫ বজালৈকে প্ৰায় ৪ ঘন্টা সময় জেৰা চলায় NIAৰ বিষয়াই।
কৃষক নেতা অখিল গগৈৰ বিৰুদ্ধে ৰুজু হৈ থকা ১৩/২০১৯ নম্বৰ গোচৰ সন্দৰ্ভত NIAই সাংবাদিকগৰাকীক সোধা-পোচা কৰে।
জেৰাৰ অন্তত সাংবাদিকগৰাকীয়ে সংবাদ মাধ্যমৰ আগত মন্তব্য কৰি কয়, ‘কা বিৰোধী আন্দোলনৰ কিছু কথা-বতৰা বিশেষকৈ অখিল গগৈৰ সৈতে কি কি কথা পাতিছিলো সেই সন্দৰ্ভত সোধা-পোচা কৰে। অখিল গগৈৰ লগত সাংবাদিকতাৰ বাহিৰৰ কথা-বতৰা পতা বুলিও মোক কৈছে।‘
‘মই কৈছো যে, এইখিনি কথা কোনো কাৰণত মোৰ হ’ব নোৱাৰে। এজন সাংবাদিক হিচাপে এজন জাতীয় নেতাৰ লগত যিধৰণৰ যোগাযোগ থাকিব লাগে সেইখিনি যোগাযোগ আছে। তেওঁলোকে বাৰে বাৰে চেষ্টা কৰিছিল আৰু জেৰা কৰিছিল যে এইখিনি কথা আপোনাৰে আপুনি হয় বুলি কওঁক। যদি আপুনি এতিয়া নকয়, তেন্তে আপোনাৰ ভইচ চেম্প’ল টেষ্ট কৰা হ’ব। আপোনাক হয়তো আমি গ্ৰেপ্তাৰো কৰিবলগীয়া হ’ব পাৰে।‘ সংবাদ মাধ্যমৰ আগত বৰুৱাই এইদৰে কয়।
তেওঁ লগতে কয় ‘মই তেতিয়া কৈছো আপোনালোকে যি কৰে কৰক, এইখিনি কথা-বতৰা মোৰ নহয়। তাৰ পাছত তেওঁলোকে পুৰণা ৰেকৰ্ড চালে, কম্পিউটাৰত কিবা-কিবি চালে আৰু শেষ মুহূৰ্তত পতিয়ন হ’ল যে এই কথাখিনি মোৰ নহয় তাৰ পাছতে মোক যাবলৈ দিলে।‘
ইপিনে কেৱল তেওঁকেই নহয়, কা বিৰোধী আন্দোলনৰ লগত জড়িত লোকসকলক টাৰ্গেট কৰি লোৱা বুলি তেওঁ উল্লেখ কৰে।
