উত্তৰ প্ৰদেশত দিনৰ দুপৰতে সাংবাদিকক গুলীয়াই হত্যা কৰাৰ অভিযোগ উত্থাপন হৈছে। মৃত সাংবাদিকজনৰ নাম ৰাঘবেন্দ্ৰ বাজপেয়ী (৩৬)। এখন হিন্দী দৈনিক কাকতৰ সংবাদদাতা তথা আৰ টি কৰ্মী। লক্ষ্ণৌ-দিল্লী ৰাষ্ট্ৰীয় ঘাইপথত শনিবাৰে সংঘটিত হয় এই ঘটনা। আৰক্ষীয়ে ঘটনাৰ তদন্ত আৰম্ভ কৰিছে।
জানিব পৰা মতে, শনিবাৰে বিয়লি উত্তৰ প্ৰদেশৰ সীতাপুৰ জিলাৰ মাহোলী থানা এলেকাত ৰাঘবেন্দ্ৰ বাজপেয়ীয়ে বাইক চলাই আহিছিল। মাহোলী অভাৰব্ৰিজৰ সমীপতে তেওঁৰ পথ অৱৰোধ কৰা হয়। দুষ্কৃতিকাৰীয়ে ৰাঘবেন্দ্ৰক গুলীয়াই হত্যা কৰে। মুঠতে তিনিটা গুলী মৰা হয়। এটা গুলী বুকুত আৰু এটা কান্ধত লাগিছিল। স্থানীয় চিকিৎসালয়লৈ লৈ যোৱাত চিকিৎসকে তেওঁক মৃত বুলি ঘোষণা কৰে।
সীতাপুৰৰ অতিৰিক্ত আৰক্ষী অধীক্ষক (দক্ষিণ) প্ৰবীণ ৰঞ্জন সিঙে জনোৱা মতে, দুপৰীয়া ৰাঘবেন্দ্ৰ বাজপেয়ী বাইক চলাই যোৱা অৱস্থাত মাহোলী অভাৰব্ৰিজৰ সমীপত আক্ৰমণ সংঘটিত হয়। দোষীক বিচাৰি আৰক্ষীৰ চাৰিটা দল গঠন কৰা হৈছে। শীঘ্ৰে অপৰাধীসকলক কৰায়ত্ত কৰা হ’ব। প্ৰত্যক্ষদৰ্শীয়ে জনোৱা মতে, মুঠ তিনিজন দুষ্কৃতিকাৰী বাইকত আহি হঠাতে গুলীচালনা কৰি পলায়ন কৰে।
মৃত সাংবাদিকগৰাকীৰ পৰিয়ালে আৰক্ষীক জনোৱা মতে, ৰাঘবেন্দ্ৰই মাহোলী অঞ্চলত ধান ক্ৰয় আৰু মাটিৰ চুক্তিৰ অনিয়মৰ কেইবাটাও বাতৰি সংগ্ৰহৰ কাম কৰি আছিল। যোৱা দহ দিন ধৰি ফোনযোগে তেওঁলৈ ভাবুকি আহিছিল। শনিবাৰে ৰাঘবেন্দ্ৰলৈ ফোন আহে। অলপ পিছতে তেওঁ মাহোলী এৰি সীতাপুৰত থকা কাৰ্যালয়লৈ যায়। অৱশ্যে এই হত্যাকাণ্ডৰ আঁৰৰ উদ্দেশ্য নিশ্চিত কৰা নাই আৰক্ষীয়ে।
