জীৱন যুদ্ধত হাৰ মানিলে প্ৰাক্তন ফৰাচী ফুটবলাৰ তথা ফিফা বিশ্বকাপৰ ইতিহাসত এক বিৰল অভিলেখৰ গৰাকী জাষ্ট ফণ্টেইনে। বুধবাৰে প্ৰাক্তন ফুটবল তাৰকাগৰাকীৰ মৃত্যুৰ কথা সদৰী কৰে পৰিয়ালৰ লোকে। মৃত্যুৰ সময়ত ফণ্টেইনৰ বয়ষ আছিল ৮৯ বছৰ।
উল্লেখ্য যে, ফুটবল বিশ্বকাপৰ ইতিহাসত ফণ্টেইনৰ নামত আছে এক দীৰ্ঘদিনীয়া অভিলেখ। ১৯৫৮ চনৰ ছুইডেন বিশ্বকাপত ফণ্টেইনে ফ্ৰান্সৰ হৈ ১৩ টা গ’ল স্ক’ৰ কৰি গ’ল্ডেন বুট জয় কৰাৰ লগতে বিশ্বকাপৰ এটা সংস্কৰণত সৰ্বাধিক গল স্ক’ৰাৰ হিচাপে পৰিগণিত হৈছিল।
তেতিয়াৰ পৰা বিগত বৰ্ষৰ কাটাৰ বিশ্বকাপলৈকে ফণ্টেইনৰ এই অভিলেখ অক্ষত অৱস্থাত আছে। বিশ্বকাপৰ ইতিহাসত সৰ্বাধিক গ’লদাতাৰ তালিকাত ফণ্টেইন আৰ্জেণ্টাইন তাৰকা লিঅ’নেল মেছিৰ সৈতে যুটীয়াভাৱে আছে চতুৰ্থ স্থানত।
জাৰ্মানীৰ মিৰ’শ্লাভ ক্ল’জ ১৬ টা গলেৰে প্ৰথম, ব্ৰাজিলৰ ৰোনাল্ড’ ১৫ গলেৰে দ্বিতীয় আৰু জাৰ্মানীৰ গাৰ্ড মূলাৰ ১৪ টা গলেৰে বিশ্বকাপ ইতিহাসত সৰ্বাধিক গল স্ক’ৰাৰৰ তালিকাৰ তৃতীয় স্থানত আছে। অৱশ্যে ফণ্টেইনে কেৰিয়াৰৰ মাত্ৰ এখন বিশ্বকাপত অংশগ্ৰহণ কৰি ৬ খন মেচতে এই সফলতা লাভ কৰিছিল।
১৯৩৩ চনৰ আগষ্ট মাহত সেইসময়ৰ ফৰাচী উপনিৱেশ মৰক্কোৰ মাৰাকেচত জন্ম হৈছিল ফণ্টেইনৰ। ফৰাচী পিতৃ আৰু স্পেনিছ মাতৃৰ সন্তান ফণ্টেইনে কাছাব্লাংকাত স্কুলীয়া শিক্ষাৰ লগতে ফুটবল কেৰিয়াৰো আৰম্ভ কৰে।
১৯৫৩ চনত তেওঁ ফ্ৰান্সলৈ যায় আৰু ফৰাচী ক্লাৱ নাইচত যোগদান কৰে। নাইচত তিনি বছৰীয়া কেৰিয়াৰত ফণ্টেইনে তথাপিও প্ৰথম ছিজনত ফ্ৰেন্স কাপ আৰু ১৯৫৬ চনত লীগ খিতাপ জয় কৰে।
ইয়াৰ পিছত তেওঁ প্ৰখ্যাত ফৰাচী ক্লাৱ ৰেইমছৰ সৈতে চুক্তিবদ্ধ হয়। ফণ্টেইনে ৰেইমছত তিনিটা লীগ খিতাপ আৰু ফ্ৰেন্স কাপ জয় কৰে।
কিন্তু ১৯৬২ চনত মাত্ৰ ২৮ বছৰ বয়সতে তেওঁৰ ফুটবল কেৰিয়াৰৰ অন্ত পৰে। আঘাতৰ বাবে কম বয়সতে এক সম্ভাৱনাপূৰ্ণ ফুটবল কেৰিয়াৰ সামৰিবলৈ বাধ্য হয় ফণ্টেইন। এই চমু কেৰিয়াৰত ফ্ৰান্সৰ হৈ ২১ খন খেলত ৩০ টা স্ক’ৰ কৰিছিল ফণ্টেইনে।
উল্লেখ্য যে, কেৰিয়াৰ চমু হ’লেও ফণ্টেইনে নিজৰ নিপুণ ক্ৰীড়াশৈলীৰে ফুটবল জগতত নিজৰ সাঁচ ৰাখি যায়। সেইবাবেই হয়তো ফুটবল সম্ৰাট পেলেই ২০০৪ চনত বিশ্বৰ সৰ্বশ্ৰেষ্ঠ ১২৫ গৰাকী জীৱিত ফুটবলাৰৰ তালিকাত ফণ্টেইনক স্থান দিছিল।
