দুৰন্ত কে এল ৰাহুল; ভংগ কৰিলে বিৰাট কোহলীৰ নামত থকা এই অভিলেখ
কেৰিয়াৰৰ শ্ৰেষ্ঠ ফৰ্মত থকা ভাৰতৰ অপেনিং বেটছমেন কে এল ৰাহুলে নিউজিলেণ্ডৰ বিৰুদ্ধে অনুষ্ঠিত টি-২০ ছিৰিজত ভাৰতৰ হৈ দ্বিপাক্ষিক টি-২০ ছিৰিজত সৰ্বাধিক ৰান সংগ্ৰহকাৰী খেলুৱৈ হিচাপে পৰিগণিত হৈ নতুন অভিলেখ স্থাপন কৰে।
নিউজিলেণ্ডৰ বিৰুদ্ধে পাঁচখন মেচৰ টি-২০ ছিৰিজটোত কে এল ৰাহুলে মুঠ ২২৪ ৰান সংগ্ৰহ কৰে।
মাউণ্ট মাউংগানুইত অনুষ্ঠিত অন্তিমখন টি-২০ খেলত ৰাহুলে ৪৫ ৰান সংগ্ৰহ কৰে আৰু ভাৰতৰ হৈ এটা দ্বিপাক্ষিক ছিৰিজত সৰ্বাধিক ৰান সংগ্ৰহকাৰী খেলুৱৈ হিচাপে পৰিগণিত হয়।
উল্লেখযোগ্য যে, ইয়াৰ পূৰ্বে এই অভিলেখ আছিল ভাৰতীয় দলৰ অধিনায়ক তথা তাৰকা বেটছমেন বিৰাট কোহলীৰ নামত।
বিৰাট কোহলীয়ে অষ্ট্ৰেলিয়াৰ বিৰুদ্ধে ২০১৬ চনত তিনিখন টি-২০ খেলত ১৯৯ ৰান সংগ্ৰহ কৰি এই অভিলেখ স্থাপন কৰিছিল।
ভাৰত আৰু নিউজিলেণ্ডৰ মাজত অনুষ্ঠিত পাঁচখনীয়া টি-২০ ছিৰিজটো ভাৰতে ৫-০ ব্যৱধানত জয়লাভ কৰে।
এই ছিৰিজটোত কে এল ৰাহুলে উইকেটৰক্ষকৰ দায়িত্ব পালন কৰাৰ উপৰিও অন্তিমখন খেলত ভাৰপ্ৰাপ্ত অধিনায়ক ৰোহিত শৰ্মা আঘাতপ্ৰাপ্ত হোৱা বাবে অধিনায়ক হিচাপেও সকলোৰে দৃষ্টি আকৰ্ষণ কৰিবলৈ সক্ষম হৈছিল।